इलेक्ट्रिक ट्याक्सीमा टाटा टिगोर, महिन्द्रा ई–भेरिटो र बीवाईडी एम३ को सम्भावना

काठमाडौं – वाग्मती प्रदेश सरकारले सार्वजनिक यात्रुवाहक ट्याक्सी सेवाको गुणस्तर, संचालन तथा व्यवस्थापन सम्बन्धी मापदण्ड २०७८ जारी गरे पश्चात भविष्यमा काठमाडौं लगायत वाग्मती प्रदेशमा चल्ने ट्याक्सी कस्ता हुनेछन् भन्ने वारेमा चासो बढेको छ ।

विद्युतीय सवारीसाधनको मापदण्डसँगै सरकारले २० वर्ष पुराना ट्याक्सीलाई नयाँमा रुपान्तरण गर्दा अनिवार्य विद्युतीय ट्याक्सी लिनु पर्ने व्यवस्था गरेको छ ।

साधारण ट्याक्सी र विशेष (डिलक्स) ट्याक्सीमा वर्गीकरण गरी दुई किसिममा विद्युतीय ट्याक्सी चलाउने गरी प्रदेश सरकारले मापदण्ड ल्याएको हो । नयाँ मापदण्ड अनुसार साधारण ट्याक्सी ५ सिट क्षमताको हुनु पर्ने छ भने विशेष ट्याक्सी ५ वा ७ सिट क्षमताको हुनसक्ने उल्लेख छ ।

सेडान कार नै हुनु पर्ने उल्लेख गरेको मापदण्डमा २०० लिटर माथिको बुट स्पेश, कम्तीमा ३० किलोवाट क्षमताको मोटर र २० किलोवाट आवरको लिथियम आयोन ब्याट्री हुनु पर्ने उल्लेख छ । साथै यस्ता ट्याक्सीको न्यूनतम रेन्ज २१० किलोमिटर हाराहारी हुनु पर्ने उल्लेख छ ।

यी सबैका आधारमा हाल नेपाली बजारमा उपलब्ध विद्युतीय सवारी साधन मध्ये भविष्यमा ट्याक्सीका लागि प्रयोग गर्न सकिने सवारी साधनको रुपमा महिन्द्राको ई–भेरिटो, टाटाको टिगोर र बीवाइडीको एम३ हुन सक्ने देखिएको छ । बडी डिजाइनका आधारमा सेडान भनिएकाले मापदण्ड अनुसार यी तीनवटा सेडान ट्याक्सीको रुपमा प्रयोग गर्न सकिने छ ।

अधिकांश मापदण्ड पूरा गर्ने कारको रुपमा टाटा टिगोर ईभी देखिएको छ । यसमा भएको ब्याट्रीले सिंगल चार्जमा ३०६ किलोमिटरको रेन्ज दिने भारतको एआरआईले प्रमाणित गरेको छ । यो कारमा २६ किलोवाट आवरको लिक्विड–कुल्ड ब्याट्री प्याक जडान गरिएको छ । यसको सबैभन्दा सस्तो भेरिएन्टको मूल्य ३२ लाख ८५ हजार रुपैयाँ छ ।

ई–भेरिटोमा २१.२ किलोवाट आवरको ब्याट्री छ । यद्यपि यसको एउटा भेरिएन्टले ११० किलोमिटर मात्र रेन्ज दिने बताइएको छ । यसमा ५१० लिटरको बुट स्पेस छ ।

बीवाईडी एम३ मा ४४.९ किलोवाट आवरको ब्याट्री र १०० किलोवाटको मोटर छ । यसले सिंगल चार्जमा ३१० किलोमिटरको रेन्ज दिन्छ ।

महिन्द्रा ई–भेरिटोको मूल्य ३९ लाख ८० हजार रुपैयाँ र बीवाईडी एम३ को मूल्य ४२ लाख ५० हजार रुपैयाँ तोकिएको छ ।