यस्ता हुनेछन् भविष्यका इलेक्ट्रिक कार, अत्याधुनिक प्रविधि र अद्भुत डिजाइनले सुसज्जित

इलेक्ट्रिक सवारी साधनको लोकप्रियता बढेसँगै विभिन्न कम्पनीहरूले फ्युचरिस्टिक इलेक्ट्रिक कारको कन्सेप्ट मोडल सार्वजनिक गरेका छन् ।  विज्ञहरूका अनुसार यस्ता कन्सेप्ट कारहरू केवल प्रदर्शनीका लागि मात्र निर्माण गरिएका हुँदैनन्। यी मोडलहरूले कम्पनीको दीर्घकालीन सोच, नयाँ प्रविधि र डिजाइनको सोचलाई प्रतिबिम्बित गर्छन्।

एम कन्सेप्ट नोए क्लासे: बिएमडब्ल्युले आफ्नो हाई परफर्मेन्स इलेक्ट्रिक कार ‘एम कन्सेप्ट नोए क्लासे’ कन्सेप्ट मोडल सार्वजनिक गरेको छ । यसमा मस्कुलर डिजाइन, इल्युमिनेटेड ग्रिल तथा ड्राइभर केन्द्रित ककपिट देख्न सकिन्छ । सो अवधारणाको मुख्य आकर्षण ४ वटा इलेक्ट्रिक मोटर हुनु हो । कम्पनीले यसमार्फत प्यानोरामिक भिजन डिस्प्ले र हल्का तौल निर्माण प्रविधिसमेत प्रदर्शन गरेको छ ।

मर्सिडिज बेन्ज ‘भिजन वान इलेभेन’ : त्यसैगरी, मर्सिडिज बेन्जले ‘भिजन वान इलेभेन’ अवधारणा सार्वजनिक गर्दै विगत र भविष्यलाई एउटै प्लेटफर्ममा जोड्ने प्रयास गरेको छ। सन् १९७० दशकका चर्चित सी–१११ प्रयोगात्मक कारबाट प्रेरित सो मोडलमा रेट्रो शैली र आधुनिक प्रविधिको आकर्षक संयोजन गरिएको छ। लो स्लंग बडी, गलविङ डोर र कपर थिमको क्याबिनले यसलाई विशिष्ट बनाएको छ।

अउडी ‘एक्टिभस्फेयर’: अउडीले पनि एक्टिभस्फेयर अवधारणाको  फ्युचरिस्टिक इलेक्ट्रिक सवारी साधन सार्वजनिक गरेको छ । सो इलेक्ट्रिक क्रसओभरमा अग्मेन्टेड रियालिटी डिस्प्ले, अटोनोमस ड्राइभिङ फिचर तथा आवश्यकताअनुसार प्रयोग गर्न सकिने फ्लेक्सिबल रियर कार्गो एरिया समावेश गरिएको छ।

पोर्श ‘मिसन एक्स’: स्पोर्ट्स कार निर्माता पोर्शले ‘मिसन एक्स’ नामक इलेक्ट्रिक हाइपरकारको अवधारणा प्रस्तुत गरेको छ । बटरफ्लाइ डोर, अल्ट्रा लो कार्बन फाइबर बडी र नयाँ पुस्ताको ब्याट्री प्रविधिसहितको सो कार उच्च गति र उत्कृष्ट नियन्त्रणलाई केन्द्रमा राखेर डिजाइन गरिएको छ। कम्पनीले यसलाई इलेक्ट्रिक हाइपरकारहरूको भविष्यको प्रतिनिधिका रूपमा प्रस्तुत गरेको छ।

जागुआर ‘टाइप ००’: जागुआरले पनि आफ्नो भावी इलेक्ट्रिक यात्राको लागि ‘टाइप ००’ अवधारणा प्रस्तुत गरेको छ। लामो बोनट र मिनिमलिस्ट डिजाइनले यसलाई परम्परागत जागुआर मोडलभन्दा फरक बनाएको छ। कम्पनीका अनुसार सो अवधारणाले आगामी पुस्ताका प्रिमियम इलेक्ट्रिक कारको डिजाइन र इनोभेसनको दिशा निर्धारण गर्नेछ।