यसो भए ईभी तपाईका लागि उपयुक्त नहुन सक्छ

आजको समयमा इलेक्ट्रिक कारप्रति आकर्षण तीव्र रूपमा बढिरहेको छ। कम सञ्चालन खर्च, आधुनिक प्रविधि, उत्कृष्ट सुविधाहरू र वातावरणमैत्री विशेषताका कारण धेरै उपभोक्ताहरू पेट्रोल र डिजेल सवारी साधन छोडेर इलेक्ट्रिक कारतर्फ आकर्षित भइरहेका छन्। तर, विज्ञहरूका अनुसार इलेक्ट्रिक कार सबैका लागि उपयुक्त विकल्प भने होइन।

यदि कुनै व्यक्तिको दैनिक सवारी दूरी अत्यन्तै कम छ भने इलेक्ट्रिक कार उनीहरूका लागि उपयुक्त नहुन सक्छ। ईभीको प्रारम्भिक मूल्य पेट्रोल कारको तुलनामा निकै महँगो हुने भएकाले त्यसको लागत उठाउन लामो समयसम्म र धेरै दूरी चलाउनुपर्ने हुन्छ। हप्तामा एक-दुई पटक मात्र वा दैनिक १०–२० किलोमिटर जति मात्र गाडी प्रयोग गर्नेहरूका लागि पेट्रोल वा हाइब्रिड कार बढी व्यवहारिक मानिन्छ।

त्यसैगरी, घरमै चार्ज गर्ने सुविधा नभएकाहरूका लागि पनि इलेक्ट्रिक कार समस्या बन्न सक्छ। ईभीको मुख्य सुविधा भनेकै घरमै सजिलै चार्ज गर्न सक्नु हो। तर पार्किङ सुविधा नभएको अपार्टमेन्ट वा चार्जिङ पोइन्टसम्म सहज पहुँच नहुने स्थानमा बस्नेहरूलाई बारम्बार सार्वजनिक चार्जिङ स्टेशनमा निर्भर रहनु पर्ने हुन्छ। यसले समय, खर्च र असुविधा बढाउन सक्छ।

ग्रामीण वा दुर्गम क्षेत्रतर्फ बारम्बार यात्रा गर्नुपर्ने व्यक्तिहरूका लागि पनि ईभी उपयुक्त नहुन सक्छ। हालसम्म धेरै स्थानमा चार्जिङ पूर्वाधार पर्याप्त रूपमा विकास भइसकेको छैन। लामो दूरीको यात्रामा बीचमै ब्याट्री सकिने जोखिम र चार्ज गर्न घण्टौं कुर्नुपर्ने अवस्था तनावपूर्ण बन्न सक्छ।

रिसेल भ्यालुलाई प्राथमिकतामा राख्ने उपभोक्ताले पनि इलेक्ट्रिक कार किन्नुअघि सोच्नुपर्ने देखिन्छ। अहिलेको अवस्थामा ईभीको रिसेल भ्यालु पेट्रोल कारको तुलनामा कम छ। यसको मुख्य कारण ब्याट्रीको आयु र उच्च प्रतिस्थापन लागत हो। ५–७ वर्ष पुरानो इलेक्ट्रिक कार किन्न धेरैजसो मानिस हिचकिचाउने गर्छन्, किनकि ब्याट्री बदल्नुपर्ने लागत कारको कुल मूल्यको ठूलो हिस्सा हुन सक्छ।

भाडाको घरमा बस्नेहरूका लागि पनि ईभी चुनौतीपूर्ण हुन सक्छ। चार्जिङ पूर्वाधार जडान गर्न घरधनीको अनुमति आवश्यक पर्नु, छुट्टै मिटरको झन्झट र बारम्बार घर सर्दा चार्जिङ सेटअप सार्नुपर्ने खर्चले इलेक्ट्रिक कारलाई असहज बनाउने देखिन्छ।

यसकारण, इलेक्ट्रिक कार किन्नु अघि आफ्नो प्रयोग, बसोबासको अवस्था, यात्रा आवश्यकता र दीर्घकालीन खर्चको मूल्याङ्कन गर्नु अत्यन्त आवश्यक छ। ईभी प्रविधि भविष्यको विकल्प भए पनि, सबैका लागि तत्काल सही निर्णय नहुन सक्ने विज्ञहरूको धारणा छ ।