विद्युतीय सवारी र अनएसेम्बल्ड मोटरसाइकलको आयात बढ्यो, अन्य सवारीको आयात घट्यो

वीरगञ्ज – चालु आर्थिक वर्ष २०७९/८० को पहिलो दुई महिनामा वीरगञ्ज नाकाबाट विद्युतीय सवारी साधनको आयात बढेको छ भने डिजेल र पेट्रोलबाट चल्ने सवारीसाधनको आयात घटेको छ ।

विद्युतीय जिप, कार र भ्यानको आयात ५६ प्रतिशतले बढेको तथ्यांक छ । गत आवको सो अवधिमा ४५ वटा विद्युतीय सवारीसाधन भित्रिएकोमा यो वर्ष सोही अवधिमा ७० पुगेको भन्सारले बताएको छ ।

त्यस्तै विद्युतीय मोटरसाइकलको आयातमा पनि उल्लेख्य वृद्धि भएको देखिन्छ । विद्युतीय मोटरसाइकलको आयात १९३ प्रतिशतले बढेको छ । विद्युतीय मोटरसाइकलको आयात १२३ बाट ३६१ पुगेको छ ।

पेट्रोलियम पदार्थबाट चल्ने जिप, कार र भ्यानको आयात ८१ प्रतिशतले घटेको वीरगञ्ज भन्सारको तथ्यांक छ । गत आवको दुइृ महिनामा १ हजार ६७३ वटा जिप, कार र भ्यान भित्रिएको यो नाकाबाट यो वर्षको सोही अवधिमा ३१० वटामात्र आएको देखिन्छ ।

मोटरसाइकलको आयातमा ६१ प्रतिशतले कमी आएको भन्सारले बताएको छ । अघिल्लो वर्षको २ महिनामा १२ हजार ६३३ वटा मोटरसाइकल आयात भएको थियो । यो वर्षको साउन र भदौमा ४ हजार ९६८ वगटा मोटरसाइकल मात्र भित्रिएको वीरगञ्ज भन्सारको तथ्यांक छ ।

अनएसेम्बल्ड मोटरसाइकलको आयात भने बढेको देखिन्छ । यस्तो आयात १६० प्रतिशतले बढेको छ । गत आवको पहिलो २ महिनामा यो नाकाबाट ३ हजार १९६ वटा यस्ता मोटरसाइकल भित्रिएकोमा यो वर्ष ८ हजार ३०७ वटा आएका छन् ।

विदेशी मुद्रा सञ्चितिमा परेको दबाब कम गर्न भन्दै सरकारले लिएको आयात नियन्त्रणको नीति र बैंकमा लगानीयोग्य रकमको अभावमा लगानी खुम्चिएपछि गाडीको आयात घटेको हो । सवारीसाधन भन्सारले उठाउने राजस्वको मुख्य स्रोत हो ।

त्यसैगरी सरकारले विद्युतीय सवारी साधनको प्रयोगलाई बढाउने र नेपालमै सवारी एसेम्बल गर्ने उद्योगलाई प्रोत्साहन गर्ने नीति लिएको छ । यसका कारण पनि विद्युतीय सवारी र अनएसेम्बल्ड मोटरसाइकलको आयात बढेको मान्न सकिन्छ ।