स्कुटरको आयु र माइलेज बढाउने प्रभावकारी उपाय, जान्नुहोस्

दैनिक आवतजावतका लागि स्कुटर आजका दिनमा सबैभन्दा सहज र किफायती साधन बनेको छ। युवा, महिला तथा साना परिवारले दिनहुँ २० देखि ४० किलोमिटर दूरी पार गर्न स्कुटरमै भर पर्छन्। तर शहरको धुलो, प्रदूषण, वर्षा र भीडभाडयुक्त ट्राफिकका कारण स्कुटरमा साना तर महत्त्वपूर्ण समस्या देखिन सक्छ । समयमै हेरचाह र उचित मर्मतसम्भार गर्न सके यसको आयु लम्बिनुका साथै प्रदर्शन र माइलेजमा उल्लेख्य सुधार आउँछ।

अटो विज्ञका अनुसार नियमित र सही मर्मतसम्भारले स्कुटरको आयु दोब्बरसम्म बढाउन सक्छ। माइलेज २० देखि २५ प्रतिशतसम्म सुधार हुन सक्छ भने आकस्मिक बिग्रिने समस्या ८० प्रतिशतसम्म घट्न सक्छ। यद्यपि धेरै स्कुटर प्रयोगकर्ताले सामान्य बेवास्ताका कारण अनावश्यक खर्च बढाइरहेका हुन्छन्।

सबैभन्दा पहिले नियमित सफाइ आवश्यक छ। हप्तामा कम्तीमा एक पटक नरम स्पन्ज र हल्का बाइक स्याम्पू प्रयोग गरेर स्कुटर राम्ररी धुनुपर्छ। चेन, स्प्रोकेट, ह्विल रिम र साइलेन्सर क्षेत्र विशेष ध्यान दिएर सफा गर्नुपर्छ। धोएपछि खिया लाग्न र घामको असरबाट जोगाउन बडीमा सिलिकन स्प्रे प्रयोग गर्न सकिन्छ। यसले धुलो धेरै हुने सहरमा रङ र प्लास्टिकका भागलाई लामो समयसम्म सुरक्षित राख्छ।

इन्जिनलाई स्कुटरको मुटु मानिन्छ। त्यसैले १५०० देखि २००० किलोमिटरमा इन्जिन आयल परिवर्तन गर्नु अत्यावश्यक हुन्छ । पुरानो आयलले इन्जिन अत्यधिक तात्ने, पिकअप घट्ने र इन्धन खपत बढ्ने समस्या ल्याउँछ। प्रत्येक तीन महिनामा एयर फिल्टर सफा वा आवश्यक परे परिवर्तन गर्नुपर्छ, किनकि फोहोर फिल्टरले माइलेज १५ प्रतिशतसम्म घटाउन सक्छ।

टायर, ब्रेक र सस्पेन्सनको नियमित निगरानीले सुरक्षासँगै माइलेजमा पनि प्रभाव पार्छ। प्रत्येक १५ दिनमा बिहानको समयमा टायर प्रेसर जाँच गर्नुपर्छ। अगाडिको टायर करिब २९ देखि ३२ पीएसआई र पछाडिको टायर ३३ देखि ३५ पीएसआईको आसपास राख्नु उपयुक्त मानिन्छ। कम प्रेसरले टायर चाँडै घिस्रने र इन्धन खपत बढ्ने जोखिम हुन्छ।

ब्याट्री र इलेक्ट्रिक सिस्टमको हेरचाह पनि उत्तिकै महत्त्वपूर्ण छ। अधिकांश आधुनिक स्कुटर सुक्खा ब्याट्रीसहित आउँछन्, तर पनि प्रत्येक २ महिनामा भोल्टेज जाँच गर्नु राम्रो हुन्छ। टर्मिनलमा भ्यासलिन लगाउँदा खिया लाग्ने सम्भावना कम हुन्छ। यदि स्कुटर १० दिनभन्दा बढी प्रयोगमा नआउने हो भने ब्याट्री डिस्कनेक्ट गर्नु सुरक्षित हुन्छ।

स्कुटर लामो समय प्रयोग नगर्ने हो भने ट्यांकीमा इन्धन भरि राख्नु, मुख्य स्ट्यान्डमा राख्नु र टायर उचित प्रेसरमा राख्नु आवश्यक हुन्छ। सधैं कभर प्रयोग गर्नुपर्छ र मनसुनमा सकेसम्म ग्यारेजभित्र राख्नुपर्छ। प्रत्यक्ष घाममा लामो समय पार्क गर्दा बाहिरी भागमा क्षति पुग्न सक्छ।

यस्ता उपाय अपनाउँदा स्कुटरको वार्षिक खर्च ३० देखि ४० प्रतिशतसम्म घटाउन सकिन्छ। नियमित हेरचाहले मात्र स्कुटरलाई लामो समयसम्म उत्कृष्ट अवस्थामा राख्न सम्भव हुन्छ।