सुटकेस जस्तै फोल्ड गर्न मिल्ने अनौठो इलेक्ट्रिक बाइक ‘इकोमा टाटामेल’ लन्च

जापानी कम्पनी इकोमाले एकदमै फरक र चकित पार्ने इलेक्ट्रिक बाइक लन्च गरेको छ। ‘इकोमा टाटामेल’ नाम दिइएको सो इलेक्ट्रिक बाइक प्रयोगमा नहुँदा पूर्ण रूपमा फोल्ड गरेर सुटकेस जस्तै बनाउन सकिन्छ ।

डिजाइनर ताकामित्सु इकोमाद्वारा डिजाइन गरिएको सो बाइक चलाउँदा सानो स्कुटरजस्तो देखिन्छ। तर प्रयोगपछि फोल्ड गर्दा यसको आकार केवल २७ x २७ x १० इन्चमा सीमित हुन्छ। यसको तल साना पाङ्ग्राहरू जडान गरिएको हुँदा यसलाई सामान्य सुटकेसझैं तान्दै लिफ्ट, कार्यालय वा अपार्टमेन्टभित्र सजिलै लैजान सकिन्छ । यसको तौल करिब ६३ किलोग्राम छ ।

यसमा दैनिक सहरभित्रको यात्रालाई सहज बनाउने आधुनिक इलेक्ट्रिक प्रविधि र आवश्यक सुविधाहरू समावेश गरिएको छ, जसले यसलाई सामान्य फोल्डिङ बाइकभन्दा फरक बनाउँछ।

यसको मूल्य करिब ४ लाख ९८ हजार जापानी येन तोकिएको छ। भीडभाड भएका शहरमा बस्ने, पार्किङको समस्या भोगिरहेका वा घरभित्र सवारी साधन लैजान अनुमति नपाउने व्यक्तिहरूका लागि यो एक राम्रो विकल्प हुन सक्ने बताइएको छ। सुटकेसको रूप लिने भएकाले कसैले पनि यसलाई बाइक भनेर चिन्न नसक्ने दाबी कम्पनीको छ।