ड्राइभिङ लाइसेन्स अब १० वर्षमा नवीकरण गर्न सकिने व्यवस्था हुँदै

काठमाडौं – हरेक ५ वर्षमा नवीकरण गर्नुपर्ने सवारी चालक अनुमति पत्र (ड्राइभिङ लाइसेन्स) अब १० वर्षमा गर्न सकिने प्रक्रियाको थालनी भएको छ ।

भौतिक पूर्वाधार तथा यातायातमन्त्री प्रकाश ज्वालाले मन्त्रालयमा आयोजित एक कार्यक्रममा लाइसेन्स नवीकरण प्रावधान परिवर्तन गर्न लागेको बताएका हुन् ।

हाल हरेक पाँच बर्षमा सवारी चालकअनुमति पत्र नवीकरण हुँदै आएको छ । यातायात क्षेत्रमा सबैभन्दा बढी गुनासो रहेको बताउँदै उनले लाइसेन्सका समस्या समाधान गर्ने बताए।

‘हामीले ५ वर्षमा गरिँदै आएको ड्राइभिङ लाइसेन्स नवीकरणको अवधिलाई बढाएर १० वर्ष बनाउनेतर्फ काम गरिरहेका छौ,’ उनले भने, ‘यो व्यवस्था गर्दा अहिले यातायात कार्यलयहरुमा देखिएका समस्या थोरै भए पनि समाधान हुने र नागरिकलाई पनि सजिलो हुने अपेक्षा छ।’

उनले यो व्यवस्थालाई ऐनमा समेट्न सबै निकायसँग छलफल गरेर काम अघि बढाइएको बताए।