बढ्दो मागका कारण शाओमीले बढायो लक्ष्य, यो वर्ष १ लाख ३० हजार ईभी डेलिभरी गरिने

चाइनिज कम्पनी शाओमीले यो वर्ष डेलिभरी गरिने इलेक्ट्रिक कारको संख्या बढाएर १ लाख ३० हजार पु¥याउने घोषणा गरेको छ । तेस्रो त्रैमासिक रिपोर्ट अनुसार ३०.५ प्रतिशत आय बढेको रिपोर्ट सार्वजनिक भएसँगै कम्पनीले तेस्रो पटक यो सख्या परिमार्जन गरेको हो ।

यो वर्षको प्रारम्भमा शाओमीले लन्च गरेको एसयू७ सेडान ७६ हजार युनिट बिक्री गर्ने लक्ष्य लिएको थियो । पछि माग बढ्दै जादा यो संख्या १ लाख २० हजार पु¥याउने बताइएको थियो भने अब झनै बढाएर १ लाख ३० हजार पु¥याउने बताएको हो । शाओमीका सीईओ लेई जुनले सामाजिक सञ्जालमार्फत सो जानकारी सार्वजनिक गरेका हुन् ।

गत मार्चमा स्मार्टफोन निर्माता कम्पनी शाओमीले चाइनिज बजारमा सो इलेक्ट्रिक एसयूभी लन्च गरेको थियो । यसको बेस मोडलको मूल्य ३० हजार डलर भन्दा कम राखिएको थियो, जुन चीनमा टेस्ला मोडल ३ को मूल्य भन्दा ४ हजार डलर कम थियो । यसमा भएका विभिन्न फिचर, स्टाइल र मूल्यका कारण चीनको ईभी बजारको भिडमा समेत शाओमी एसयू७ ले फरक पहिचान कायम गरेको छ ।

चीनमा ईभी र प्लग–इन–हाइब्रिड सवारी साधनको बिक्री लगातार रुपमा बढिरहेको छ र यो विश्वकै ठूलो ईभी बजार बनेको छ । गत अक्टोबरमा गत वर्ष भन्दा ५६.७ प्रतिशत बढी यस्ता गाडी बिक्री भए र ग्यासोलिन कार भन्दा यस्ता कार बढी बिक्री भएको रेकर्ड कायम भयो ।

शाओमीले गत जुन देखि ईभी उत्पादन कार्यलाई दोब्बर बनाएको छ र १ लाख १० हजार डलर मूल्यको प्रिमियम एसयू७ अल्ट्रा मोडल समेत लन्च गरेको छ ।

शाओमीका अध्यक्ष लु वेबिङले प्रतिमहिना २० हजार कार उत्पादन गर्ने क्षमता कम्पनीसँग रहेको र आगामी दिनमा यो क्षमता अझै बढ्न सक्ने सम्भावना समेत व्यक्त गरेका छन् ।