शाओमीेको पहिलो इलेक्ट्रिक कार चीनमा लन्च, यस्तो छ विशेषताहरु

चिनियाँ टेक कम्पनी शाओमीले आफ्नो पहिलो इलेक्ट्रिक कार एसयू७ चीनमा लन्च गरेको छ । कम्पनीका संस्थापक तथा सीईओ लेई जुनले सोसल मिडिया मार्फत यसलाई टेस्ला मोडल ३ सँग तुलना गरेका छन् । सो कार मे महिनामा चिनियाँ बजारमा उपलब्ध हुनेछ ।

कम्पनीले इलेक्ट्रिक सेडानलाई एसयू७, एसयू७ प्रो र एसयू७ म्याक्स गरी ३ भेरिएन्टमा लन्च गरेको छ र यसको प्रारम्भिक मूल्य ३० हजार देखि ४० हजार डलर सम्म राखिएको छ । सो अल इलेक्ट्रिक सेडान बेइजिङ अटोमोटिभ इन्डस्ट्री होल्डिङ कम्पनी लिमिटेडद्वारा निर्मित हुनेछ । यो इलेक्ट्रिक कुपे सेडान एसयू७ अटोनोमस ड्राइभिङ टेक्नोलोजीको साथ आउनेछ, जसले शाओमीको हाइपर ओएसमा काम गर्नेछ । कम्पनीले यो कार २०२४ को शुरुमा विश्व बजारमा पनि लन्च गर्नेछ । विश्व बजारमा यसले पोर्श ९११, बीएमडब्लु आई४, बीवाईडी सिल र टेस्ला मोडल ३ जस्ता कारसँग प्रतिस्पर्धा गर्नेछ ।

शाओमी एसयू७ को फ्रन्ट डिजाइन नयाँ म्याक्लेरेन्सबाट प्रेरित छ । एसयू७ मा २४५÷४५ आर१९ र २४५÷४० आर२० टायरका साथ १९ र २० इन्चको अलोय ह्विलको विकल्प छ । एसयू७ तीन रङमा उपलब्ध छ । यसको लम्बाइ ४९९७ एमएम, १९६३ एमएम, हाइट १४५५ एमएम र ह्विलबेस ३००० एमएम छ । कारमा १०५ लिटरको ठूलो फ्रङक स्पेस र ५१७ लिटरको बुट स्पेस छ ।

सो कार २ पावरट्रेन विकल्पमा प्रस्तुत गरिएको छ । यसको एसयू७ भेरिएन्टमा रियर ह्विल ड्राइभको साथमा २२० किलोवाटको भी६ मोटर जडान गरिउको छ, जसले २९९ पीएसको पावर र ४०० एनएमको टर्क उत्पादन गर्छ । सो कारले ५.२८ सेकेन्डमा ० देखि १०० किलोमिटर प्रतिघण्टाको गति लिन सक्ने र टप स्पिड २१० किमी प्रतिघण्टा हुने कम्पनीको दाबी छ ।

दोस्रो विकल्पमा अल ह्विल ड्राइभको साथमा ४९५ किलोवाटको भी६एस ड्युअल मोटर सेटअप छ, जसले ६७३ पीएस पावर र ८३८ एनएमको टर्क उत्पादन गर्छ । सो कारले २.७८ सेकेन्डमा ० देखि १०० किलोमिटर प्रतिघण्टाको गति लिन सक्ने र टप स्पिड २६५ किलोमिटर प्रतिघण्टा हुने कम्पनीको दाबी छ । कारमा टप लेभल ब्रेकिङ सिस्टम पनि दिइएको छ । यसमा ४ पिस्टन क्यालिपर, बोश डीपीबी ब्रेक कन्ट्रोलर र बोश ईएसपी १०.० स्टेबिलिटी कन्ट्रोल सिस्टम समावेश छ ।

कारमा ७३.६ किलोवाटको लिथियम आयरन फस्फेट र १०१ किलोवाट सीएटीएल सेल टु बडी गरी दुईवटा ब्याट्री प्याक विकल्प उपलब्ध छ । जसले क्रमश फुल चार्जमा ६६८ किलोमिटर र ८०० किलोमिटर प्रति घण्टाको रेन्ज प्रदान गर्छ । चार्जिङको लागि दुवै भेरियन्टमा ८०० भोल्टको हाइपर चार्जर उपलब्ध गराइनेछ । यो चार्जरले ५ मिनेट चार्जमा २२० किलोमिटर र १५ मिनेट चार्जमा ५१० किलोमिटरको रेन्ज उपलब्ध गराउने शाओमीको दाबी छ ।

एसयू७ को इन्टेरियर ड्यासबोर्डमा ३के रिजोल्युसन भएको १६.१ इन्चको सेन्ट्रल कन्ट्रोल स्क्रिन र पछाडिको यात्रुका लागि २ वटा साना ७.१ इन्चको एलसीडी उपलब्ध गराइएको छ । कम्पनीले एसयू७ मा स्मार्टफोन वा ट्याब्लेटलाई मिरर गर्न सकिने बताए । साथै क्यामेरा, रोबोट भ्याकुम क्लिनर आदि जस्ता एमआई होम उपकरणहरू एसयू७ ईभीसँग सजिलै जडान गर्न सकिनेछ ।

सो कार एक पटक फुल चार्ज गरेपछि ८०० किलोमिटरसम्मको रेन्ज दिने दाबी गरिएको छ । यसका साथै कारले सेन्ट्रल कन्ट्रोल डिस्प्ले, थ्री–स्पोक स्टेयरिङ ह्विल र बी–पिलर क्यामेराबाट फेस–रिकग्निसन अनलक गर्ने जस्ता फिचर पनि समावेश छ ।