डीपलको नयाँ अफरोडर सार्वजनिक, चीन–नेपाल सिमानाको सडकबाट राखियो नाम

चिनियाँ ब्रान्ड डीपलको नयाँ अफरोडर जी३१८ सार्वजनिक भएको छ । डीपलको यो तेस्रो मोडल हो र यसमा रेन्ज एक्सटेन्सन ईभी टेक्नोलोजीको प्रयोग गरिएको छ ।

चीन र नेपालको सीमाना जोड्ने तथा चीनको सांघाई देखि झाङमु सम्म फैलिएको राष्ट्रिय राजमार्गको नामबाट यो गाडीको नाम राखिएको हो । आकर्षक दृश्यावलोकनका लागि मात्र नभएर टफ टेरेनको रुपमा समेत लोकप्रिय रहेको सिचुआन प्रान्त देखि तिब्बत सम्मको भागलाई मध्यनजर गरी सो नाम राखिएको बताएको छ । यस अनुसार डीपल जी३१८ कठिन अफरोडमा समेत चलाउन सकिने ईभी प्रमाणित हुन्छ । लन्च इभेन्टमा देखाइएको भिडियोमा पनि सो कारले ६० प्रतिशत स्लोपमा चढेको देख्न सकिन्छ ।

गाडीमा रुफ माउन्टेड स्पटलाइटका साथै लगेज -याक र स्पेयर ह्विल समेत छ । यसमा वेडिङ, स्नो, रफ टेरेन, मड र स्यान्ड गरी पाँच ड्राइभिङ मोड छन् ।

डीपल जी३१८ मा सेल–टु–प्याक र सेल–टु–भेइकल टेक्नोलोजी छ भने यसमा गोल्डन बेल २.० ब्याट्री सिस्टम छ । यसमा ११० किलोवाट सहितको १.५टी इन्जिन छ । यसको प्योर इलेक्ट्रिक रेन्ज १९० किलोमिटर (सीएलटीसी) र १५५ किलोमिटर (डब्ल्युएलटीसी) छ ।

यो वर्षको दोस्रो क्वार्टरबाट डीपल जी३१८ को बिक्री शुरु हुने अनुमान गरिएको छ र यसको मूल्य ३ लाख युआन वा ४१ हजार ७ सय युएस डलर जति हुने अनुमान छ ।

डीपल ब्रान्ड चांगानको न्यु इनर्जी भेइकल ब्रान्ड हो । डीपल जी३१८ भन्दा पहिले डीपल एस७ र एसएल०३ मोडल उपलब्ध छन् ।

नेपालमा पनि एमएडब्लु वृद्धि अटोकर्पले चांगानका विभिन्न मोडल बिक्री–वितरण गरिरहेको छ भने डीपलका दुई मोडल छिट्टै नै उपलब्ध गराउने बताएको छ ।

आगामी दिनमा नयाँ अफरोडर ईभी समेत नेपाली बजारमा उपलब्ध हुने अनुमान गर्न सकिन्छ ।