समग्र व्यवसायीलाई समेटेको र सञ्चालित होइन, स्वचालित टिम बनेको दिपक अग्रवालको दाबी

दिपक अग्रवाल जगदम्बा मोटर्सका भाइस प्रेसिडेन्ट हुन् । नेपालमा टीभीएसका मोटरसाइकल र स्कुटर तथा तीन पांग्रे सवारीको बिक्री–वितरण गरिरहेको जगदम्बा मोटर्सको पहिचानलाई थप विस्तार गर्नमा अग्रवालको महत्वपूर्ण भूमिका छ ।

आगामी मंसिर २२ र २३ गते हुने नाडा अटोमोबाइल्स एसोसिएसनको साधारण सभा र निर्वाचनको चहलपहल हाल चुलिदो अवस्थामा छ । अटोमोबाइल व्यवसायीहरुसको संगठन नाडाको यो भन्दा पहिलेको दुई कार्यकालमा कार्य समिति सदस्य रहेका दिपक अग्रवाल अहिले पनि चुनावी प्रतिस्पर्धामा होमिएका छन् । दुई प्यानलले चुनावमा भाग लिइरहेको अवस्थामा उनी ध्रुव थापाको प्यानलमा रहेका छन् ।

विगतमा सहमतिमार्फत नै कार्यसमिति छानिने गरेको र यति धेरै छलफल नभएको अवस्था थियो । तर अहिले भने देशैभरका अटोमोबाइल व्यवसायीहरुका बीच दुवै प्यानल पुगेर छलफल गरेका छन् । यसबाट अटोमोबाइल व्यवसायीका एजेन्डाको उठान भएको अग्रवालको तर्क छ । उनी भन्छन्, ‘हामी विगत ३ महिना देखि नाडा निर्वाचनको तयारीमा लागिरहेका छौ ं। पूर्व मेचीदेखि पश्चिम महाकाली सम्म अटोमोबाइल व्यवसायसँग प्रत्यक्ष वा अप्रत्यक्ष रुपमा जोडिनुभएका साथीहरुसँग हामीले विभिन्न प्रकारका छलफल गरेका छौ । यो भन्दा पहिले व्यवसायीहरुका एजेन्डा माथिल्लो लेवलसँग किन पुगेनन् भन्ने वारेमा छलफल गरेका छौं ।

अहिले नाडाको वारेमा सम्पूर्ण तहमा छलफल चलेको छ । अहिले सम्म किन हामीसँग छलफलका लागि कोही पनि आएन र हाम्रो अनुहार हेरिएन भन्ने वारेमा धेरैले प्रश्न उठाउन सक्ने हुनुभएको छ । यसबाट देशभर व्यवसायीहरुको हितका लागि गरिनु पर्ने कार्यवारे चेतना फैलिएको छ ।’

यही कुरालाई मनन गरी आफूहरुले सहभागितात्मक टिमको निर्माण गरेको उनले बताए । उनका अनुसार यसलाई समावेशी टिम भन्न सकिन्छ । उनले भने, ‘राजनीतिक रुपमा समग्र वर्गलाई समेटेर समावेशी भनिने गरिन्छ । हामीले चाहिं समग्र क्षेत्रलाई समेटेका छौ । क्षेत्र भन्नाले अटोमोबाइलका विभिन्न क्षेत्र जस्तैः अटोमोबाइल आयातकर्ता, वितरक देखि रिकन्डिसन व्यवसायी र वर्कसप व्यवसायी सम्मलाई समेटेका छौ । यसमा इलेक्ट्रिक भेइकल, टायर, ट्युब, लुब्रिकेन्ट आदि सबै व्यवसायी सम्मिलित टिम बनेको छ । हाम्रो टिमले यी सबै प्रकारका व्यवसायीसँग प्रत्यक्ष भेटघाट गर्ने देखि लिएर अप्रत्यक्ष रुपमा भेटघाटका लागि सामाजिक सञ्जाल र अन्य विभिन्न माध्यमको समेत प्रयोग गरिरहेका छौ ।’

अग्रवाल हालको कार्यसमितिमा समेत संलग्न छन् । यसका आधारमा हालको कार्यसमितिले गरेका राम्रा वा नराम्रा कार्यको जिम्मेवारी समेत लिनुपर्ने उनको तर्क छ । तर पनि उनले आफूलाई विद्रोही सदस्यको रुपमा चिनाउने गरेका छन् । यो अवधिमा केही राम्रा काम भए पनि गर्न सकिने कार्यहरु समेत गर्न नसकिएको उनको स्वीकारोक्ति छ ।

पहिले दुई कार्यकालमा उनी निर्वाचित हुँदा र अहिलेको समय फेरिएको छ । पहिले निश्चित घरानाका व्यवसायीहरुलाई केन्द्रमा राखेर एक प्रकारको सिन्डिकेटबाट कार्यसमिति बन्ने गरेको उनको भनाइ छ । विगतमा त्यसको एक भागको रुपमा आफू रहेको भए पनि अब भने सञ्चालित होइन, स्वचालित टिमको निर्माण गरी विगतको परम्परालाई तोड्ने अभियानमा लागेको उनी बताउँछन् । त्यही विमतिलाई सहमतिमा ल्याउने प्रयासकै रुपमा आफू यो टिममा लागेको उनको भनाइ छ ।

आफूहरु विजयी भएर नयाँ कार्यसमिति बनेमा संस्थागत स्वार्थलाई मात्र लक्ष्य लिएर अगाडि बढ्ने टिमको लक्ष्य छ । उनी भन्छन्, ‘हाल नाडामा विभिन्न समिति भए पनि यस्ता समितिसँग सम्बन्धित समस्या सुल्झाउनका लागि सरकारी निकायमा माग पत्र पेश गर्ने काम मात्र भएको छ । तर हामीले समाधान सहितको कार्यक्रम अन्य निकायमा पेश गर्ने र आवश्यक परेमा विशेषज्ञहरुको सल्लाह समेत लिन सक्छौ । यसका लागि स्पेशल टास्क फोर्स समेत बनाउने र कुनै विवाद नआओस् भन्ने कुरामा समेत सचेत हुने गरी हामी अगाडि बढ्ने छौ ।’

व्यावसायिक घरानाहरु हाल दुई पक्षमा विभाजित भएको अवस्था छ । यो अवस्थामा भोलि हारजित हुँदा नाडा पनि विभाजित हुन सक्छ भन्ने भय पनि छ । तर विगतका दिनमा र अहिले पनि घरानाहरु विभाजित नभएको र व्यक्तिगत विचारका आधारमा मात्र विभाजित भएको उनको तर्क छ । पछि कार्यसमिति बने पछि सबै व्यवसायी एकजुट भएर व्यावसायिक हितमा लाग्ने उनको भनाइ छ । उनका अनुसार व्यक्तिगत रुपमा विचार फरक हुन सक्छ । विगतको अभ्यास हेर्दा पनि साझा एजेन्डा र लक्ष्यमा कार्यसमितिका सबै मिलेर अगाडि बढेको इतिहास छ ।

उनी भन्छन्, ‘संस्थागत रुपमा नाडाले कुनै निर्णयका लागि लबिङ गर्दा कुनै एउटा ब्रान्डलाई फाइदा पुग्ने र अर्कोलाई घाटा हुने गरी गर्नु भएन । अन्तर्राष्ट्रिय संघ संस्थाहरुसँग सम्बन्धनका कुरा, डिजिटलाइजेसनका कुरा, डाटा बैंकका कुरा, हेल्प सेन्टरका कुरा, विकेन्द्रकरणका कुरा आदि धेरै गर्न सकिने कुरा छन् । यसो भयो भने हामीले नाडालाई सबैको पहुँचमा लैजान र बलियो बनाउन सक्छौ । पहिले देशभित्रै यसलाई बलियो बनाएर अन्तर्राष्ट्रिय रुपमा पनि थप सशक्त बनाउन सक्छौ । तल्लो लेवल मात्र नभएर माथिल्लो लेवलमा पनि जति सक्यो धेरैसँग सहकार्य गर्न सकिने गरी नाडालाई अगाडि बढाउनु पर्छ भन्ने हाम्रो मान्यता छ ।’

उनी भन्छन्, ‘नाडालाई सबै अटोमोबाइल व्यवसायीको साझा कसरी बनाउने भनेर साझा तरिकाले नै अगाडि बढिरहेका छौ । व्यक्तिगत रुपमा हाम्रो कुनै एजेन्डा छैन । नाडाले पुरा गर्न नसकेका साना कुराहरुलाई नै आधार बनाएर हामीले प्रतिबद्धता पत्र सार्वजनिक गरेका छौ । यी सबै गर्न सकिने कार्य छन् ।’

नाडालाई सबै अटोमोबाइल व्यवसायीको साझा बनाउनका लागि ध्रुव थापा प्यानललाई भोट दिन उनले अपिल गरेका छन् ।