विराटनगर अपडेट : छुट होइन, यो बाइकका लागि बढी नै मूल्य तिर्न समेत तयार छन् ग्राहक

विराटनगर – विराटनगरमा यामाहाको डिलर तिरुपति अटो प्यालेसले अन्य मोडलका साथै पछिल्लो समयमा चर्चित बनेको एमटी–१५ बाइक ६० भन्दा बढी संख्यामा बिक्री गरेको छ । तर हाल यो बाइक ग्राहकले बुकिङ गर्न समेत पाएका छैनन् ।

तिरुपति अटो प्यालेसका सोरुम इन्चार्ज राजकुमार श्रेष्ठले कम्पनीले बाइक उपलब्ध गराउन नसके पनि दैनिक रुपमा यो बाइकको वारेमा सोधखोज गर्ने ग्राहक धेरै भएको बताउछन् । कम्पनीले तोकेको भन्दा बढी मूल्य हालेरै भए पनि यसलाई आफ्नो बाइक बनाउन खोज्ने ग्राहक समेत प्रशस्तै थिए । आफूले भने अनुसारको कलर र मोडल चाहने ग्राहक यहाँ प्रशस्तै छन् । हाल बीएस६ मापदण्डयुक्त यो बाइकको मूल्य ४ लाख ८३ हजार ९ सय रुपैयाँ छ ।

विराटनगरमा विशेष गरी ब्ल्याक र ह्वाइट कलर अप्सनमा रहेको एमटी–१५ चाहने ग्राहक धेरै छन् । अहिले ग्राहकको माग धान्नै नसकेर कम्पनीले बुकिङ समेत नलिएको श्रेष्ठले बताए । उनी भन्छन्, ‘यदि १० जना ग्राहकको बुकिङ लिने हो भने सामान्य अवस्थामा पनि २ जनाले मात्र बाइक पाउने र ८ जनाले नपाउने अवस्था थियो । यो अवस्थामा ८ जनाको इन्क्वायरी सुनेरै हैरान हुनुपर्ने अवस्था हुन्छ । त्यसैले हामीले पछिल्लो अवस्थामा बुकिङ नै लिएका छैनौ ।’

हालै विराटनगरमा चलेको यामाहा महा एक्सचेन्ज मेलामा अन्य मोडल धेरै भए पनि एमटी–१५ मोडल भने एउटा मात्र डिस्प्ले गरिएको थियो ।

यामाहा एमटी–१५ पहिलो पटक गत वर्ष गत वर्ष अर्थात २०२१ सेप्टेम्बर २४ मा भृकुटीमण्डपमा सम्पन्न यामाहा महा एक्सचेन्ज मेलामा सार्वजनिक गरिएको थियो । त्यति बेला एकै पटक २ सय युनिट एमटी–१५ बीएस६ ग्राहकलाई डेलिभरी गरिएको थियो । २०७९ को प्रारम्भमा यो बाइक देशभर १ हजार युनिट बिक्री भएको यामाहा नेपालले घोषणा गरेको थियो ।

यामाहाको १५५ सीसी इन्जिनयुक्त एमटी–१५ पहिले देखि नै बलियो र रुचाइएको बाइक थियो । अहिले बीएस६ मापदण्डयुक्त इन्जिनका साथ यसमा अन्य धेरै विशेषता समेत थपिएका छन् । यसमा भएको विशिष्ट खालको ईसीयू मोडल, राम्रो एक्सिलरेसनका लागि भीभीए इन्जिन तथा राइडिङलाई अझै फास्ट गर्नका लागि अप्टिमाइज्ड सेकेन्डरी रिडक्सन गियर रेसियो एवं सहज गियरसिफ्टका लागि एएस क्लच उपलब्ध छ । त्यसैगरी राइडरलाई सहजता प्रदान गर्न यसमा मोटार्ड जस्तो राइडिङ पोजिसन हुन्छ भने उत्कृष्ट स्टपिङ पावरका लागि सिंगल च्यानल एबीएससहितको २८२ एमएमको फ्रन्ट डिस्क ब्रेक जस्ता उत्कृष्ट विशेषताहरुले यसमा आकर्षण थपेको छ ।

सो नेकेड स्ट्रिट फाइटरमा भएका विभिन्न विशेषताका कारण अन्य मोटरसाइकल भन्दा फरक भएको र धेरै राइडरले यसको प्रतीक्षा गरिरहेको कम्पनीको भनाइ छ । टर्क र छरितोपन, परिष्कृत कन्ट्रोल पोस्चर्स र सिंगल–च्यानल एबीएसका लागि परिचित, सबैभन्दा गतिशील लाइटवेटहरू मध्ये एक उक्त प्योर ग्रिड हाइपर नेकेड, एमटी स्टेबलबाट अतिरिक्त समय र कडा परिश्रमसहित विशेष सामग्रीहरूको प्रयोगपछि तयार गरिएको बाइक हो, एमटी–१५ बीएस६ ।