किन हरायो टीभीएसको क्लच बिनाको बाइक ‘जाइभ’ ?

टीभीएसले दुई पाङ्ग्रे सवारी साधनको टेक्नोलोजी विकासमा महत्वपूर्ण भूमिका खेलेको छ । टीभीएस क्लचरहित बाइक बजारमा ल्याउने भारतको पहिलो कम्पनी हो । टीभीएस जाइभ क्लच बिनाको भारतको पहिलो बाइक हो ।

बढ्दो ट्राफिक र बाइकमा बारम्बार क्लच थिच्ने तथा गियर परिवर्तन गर्ने झन्झटबाट छुटकारा पाउन टीभीएसले जाइभ लन्च गरेको थियो । यसअघि क्लचलेस टेक्नोलोजी स्कुटरमा मात्र सीमित थियो ।

कम्पनीले सो बाइकमा क्लच नभएको ११० सीसीको अटोमेटिक इन्जिन प्रयोग गरेको थियो । सो इन्जिनले ७५०० आरपीएममा ८.४ बीएचपीको पावर र ५५०० आरपीएममा ८.३ एनएमको टर्क जेनेरेट गर्छ । यसको तौल १०० किलो र बाइकको माइलेज ६० देखि ६५ प्रति घण्टा थियो । सो बाइक रोटरी गियर र अटोक्लचसँग सुसज्जित थियो र ४ गियर स्पिड थियो ।

टीभीएसले सो बाइक सन् २००९ मा लन्च गरेको थियो, जसको सिट मुनि स्टोरेज बक्स पनि समावेश थियो । बाइकको मूल्य ४१ हजार भारु मात्र थियो । यो बाइक नेपाली बजारमा समेत उपलब्ध थियो ।

टीभीएस जाइभ बाइक राम्रो र टेक्नोलोजीमा उत्कृष्ट भए तापनि क्लच लगाएर बाइक चलाउने बानी परेका मानिसलाई क्लच बिनाको बाइक अलि अनौठो लाग्न थाल्यो । जाइभ क्लचलेस बाइक थियो तर स्कुटरजस्तो गियरलेस थिएन ।

कम्पनीले यसमा गियर दिएको थियो, जसलाई क्लच नलगाई चलाउन असहज महसुस हुन थाल्यो र बजारमा खासै लोकप्रिय हुन सकेन । अन्ततः कम्पनीले यसलाई २०१२ मा बन्द गरिदियो ।