सिट्रोन सि३ र टाटा टियागो इभीविच रोचक प्रतिस्पर्धा हुने, यस्तो छ मूल्य, पावरट्रेन र रेन्ज

फ्रेन्च अटो निर्माता सिट्रोनले इलेक्ट्रिक सी३ लाई भारतीय बजारमा लन्च गरेको छ । टाटा टियागो इभीसंग रोचक प्रतिस्पर्धा गर्ने अनुमान गरिएको यो नयाँ इलेक्ट्रिक ह्याचव्याकको मुल्य ११ लाख ५० हजार र १२ लाख १३ हजार भारतीय रुपैयाँ निर्धारण गरिएको छ । टाटाले टियागो लङ रेन्जको मूल्य १० लाख १९ हजारदेखी १२ लाख भारतीय रुपैयाँसम्म तोकेको छ ।

लगभग समान मूल्य निर्धारण भएपनि सिट्रोन सी३ टियागोभन्दा लामो, अग्लो र चौडा रहेको छ । टियागोको तुलनामा सि३ २१२ एमएम लामो, ५६ एमएम चौडा र ६८ एमएम अग्लो छ । ह्विलवेश समेत सी३ को १४० एमएमले वढी छ । टियागो मिडियम र लङ गरी २ रेन्जमा उपलब्ध छ भने सी३ एउटै पावरट्रेनमा उपलब्ध छ ।

मूल्यका हिसावले सी३ को सिधा प्रतिस्पर्धा टियागो लङ रेन्जसंग हुने देखिएको हो । सी३ लाइभ र फिल गरी कुल २ भेरिएन्टमा उपलब्ध छ भने टियागो लङ रेन्ज एक्सजेड एक्सटी एलआर, एक्सजेड प्लस, एक्सजेड प्लस लक्जरी(७.२ किलोवाट चार्जर), एक्सजेड प्लस टेक लक्जरी र एक्सजेड प्लस टेक लक्जरी(७.२ किलोवाट चार्जर गरी कुल ५ भेरिएन्टमा उपलब्ध छ ।

टाटाले टियागो इभीमा १४ इन्चको स्टिल ह्विल दिएको छ भने सिट्रोन सी३ मा १५ इन्चको अलोई ह्विल पाउन सकिन्छ । टियागो सी३ भन्दा १६१ किलोग्राम हुलका रहेको छ ।

टियागो लङ रेन्जमा २४ किलोवाट आवरको व्याट्री जडान गरिएको छ भने इलेक्ट्रिक सी३ मा २९.२ किलोवाट आवरको व्याट्री पाउन सकिन्छ । यसैगरी टियागोको मोटर क्षमता ५५ किलोवाट रहेको छ भने सी३ मा ४२ किलोवाट आवरको मोटर दिइएको छ । व्याट्रीको आकार ठूलो भएको कारण सी३ ले दिने रेन्ज केही वढी छ ।

टियागोको रेन्ज ३१५ किलोमिरटर दावी गरिएको छ भने सी३ ले प्रदान गर्ने रेन्ज ३२० किलोमिटर रहने दावी छ । टियागोको पावर ६१ एचपी रहँदा सी३ को ५७ एचपी छ भने टर्क सी३ को वढी छ । सी३ ले १४३ एनएम टर्क जेनेरेट गर्दा टियागोले जम्मा ११४ एनएममात्र टर्क जेनेरेट गर्ने देखिन्छ ।

यी दुवै कारलाई डिसी फास्ट चार्जरको साहयतामा ५७ मिनेटभित्र १० देखी ८० प्रतिशतसम्म चार्ज गर्न सकिन्छ । सी३ लाई १५ एम्पिएरको वाल चार्जरले १० घण्टा ३० मिनेटमा फुल चार्ज गर्न सकिन्छ भने टियोगोलाई सोही एम्पिएरको चार्जरले जम्मा ८ घण्टा ४० मिनेटमै फुल चार्ज गर्न सकिन्छ ।

सीट्रोन सी३ र टियागो इभी नेपाली बजारमा आउने तयारीमा रहेका इलेक्ट्रिक कार हुन् । सिट्रोनलाई सांग्रिला मोटर्सले बिक्री गर्दै आएको छ भने टाटालाई सिप्रद्धि ट्रेडिङले । यी कार नेपाल आउँदा मूल्य ३० लाखभन्दा कम हुने आँकलन गरिएको छ ।