फिचर थप भएको सिट्रोन ईसी३ आइतबार लन्च हुँदै, मूल्य कति ?

काठमाडौं– फ्रेन्च अटो निर्माता सिट्रोनले भारतमा उत्पादन गरेको इलेक्ट्रिक कार ईसी३ को नयाँ भेरिएन्ट नेपाल आउने भएको छ । आगामी आइतबार लन्च गर्ने तयारी गरिएको उक्त कार ईसी३ को साइन भेरिएन्ट हो । ईसी३ हाल लाइभ र फिल सहित दुईवटा भेरिएन्टमा उपलब्ध छ ।

साइन ईसी३ को टप स्पेक भेरिएन्ट हो । यो नयाँ भेरिएन्टमा सिट्रोनले लाइभ र फिलमा नभएका धेरै फिचर उपलब्ध गराएको छ । ब्याट्री, मोटर र रेन्ज एउटै भएपनि यो फिचरको मामलमा अब्बल रहेको नेपालका लागि आधिकारिक वितरक सांग्रिला मोटर्सले जनाएको छ ।

कम्पनीका अनुसार यसमा रियर पार्किङ क्यामेरा, इलेक्ट्रीकल्ली एड्जस्टेबल ओआरभीएम, १५ इन्चको आकर्षक डायमण्ड कट एलोई ह्वील, अगाडी र पछाडी स्कीड प्लेट, वाइपर र रियर डिफगर लगायत फिचर थप गरिएको छ । फिचर थप भएसंगै यो कार केही महंगो समेत पर्नेछ । कम्पनी स्रोतका अनुसार ईसी३ साइनको मूल्य ४० लाख भन्दा कम नै तय हुनेछ । कम्पनीले यसको फील भेरिएन्टलाई ३५ लाख र लाइभलाई ३३ लाख रुपैयाँमा बिक्री गर्दै आएको छ ।

सिट्रोन ईसी३ मा २९.२ किलोवाट आवरको लिथियम आयोन ब्याट्री तथा ४२ किलोवाट क्षमताको मोटर जडान गरिएको छ । यो कारको ब्याट्रीलाई एकपटक फुल चार्ज गर्दा ३२० किलोमिटर रेन्ज पाउन सकिने कम्पनी दावी छ । फ्रन्ट ह्विल ड्राइभ सिस्टम दिइएको यो कारको अधिकतम पावर ५७ पिएस र टर्क १४३ एनएम छ । यसैगरी, टप स्पिड १०७ किलोमिटर र ग्राउन्ड क्लिरियन्स १७० एमएम छ ।