यस्तो छ चाइनिज मोबाइल फोन कम्पनी शाओमीले ल्याएको नयाँ इलेक्ट्रिक स्कुटर

चीनको प्रसिद्ध मोबाइल फोन निर्माता कम्पनी शाओमीले स्कुटर, गेमिङ मोनिटर र वाइफाई राउटर सहित अन्य नयाँ उत्पादन लन्च गरी आफ्नो आइन अप विस्तार गरेको छ । कम्पनीले हालै नयाँ इलेक्ट्रिक स्कुटर एमआई ३ लन्च गरिएको छ । जसमा २७५ डब्ल्युएच ब्याट्री प्याकको प्रयोग गरिएको छ । यसले सिंगल चार्जमा ३० किलोमिटरको दुरी तय गर्छ ।

रिपोर्टका अनुसार स्थानीय नियमलाई पालना गर्नका लागि सो स्कुटरको टप स्पिड २५ किलोमिटर प्रतिघन्टासम्म सीमित राखिएको छ । सो स्कुटरको ब्याट्री फुल चार्ज हुनको लागि ८.५ घन्टाको समय लाग्छ । कम्पनीले शाओमी इलेक्ट्रिक स्कुटरको मूल्य करिब ६५ हजार रुपैयाँ तोकेको छ । नयाँ मोडलको तौल १३ किलोग्राम र यसको अधिकतम भार १०० किलोग्राम रहेको छ ।

कम्पनीले फोल्डिङ मेकानिज्मलाई ३ स्टेप डिजाइनको साथमा रिडिजाइन गरेको छ । जसमा एलसीडीलाई पनि अपडेट गरिएको छ । सो स्कुटरमा एयरोस्पेस ग्रेड आल्मुनियम च्यासिस, वायवीय टायर, फ्रन्टमा ईएबीएस र पछाडि डुअल प्याड डिस्क ब्रेक, टुडब्ल्यु हेडलाइट जस्ता फिचर र दुई कलर वनसी ब्ल्याक र ग्राभिटी ग्रेमा उपलब्ध रहेको छ ।

शाओमीका मोबाइल फोन अन्य देशका साथै नेपालमा समेत लोकप्रिय बन्दै छन् । हालै शाओमी विश्वकै दोस्रो धेरै बिक्री हुने कम्पनी समेत बनेको छ ।