युरोपमा सस्तो ईभीको दौड तीव्र, चिनियाँ ब्रान्डको दबाबमा ठूला अटो निर्माता सक्रिय

युरोपेली बजारमा चिनियाँ विद्युतीय सवारीसाधन (ईभी) ब्रान्डहरूको प्रभाव तीव्र रूपमा बढ्दै गएपछि बहुराष्ट्रिय अटोमोबाइल कम्पनीहरूले कम मूल्यका ईभी मोडलहरू ल्याउने गति बढाएका छन्। बीवाईडी (BYD) र एमजी (MG) जस्ता चिनियाँ ब्रान्डहरूले बजार हिस्सा विस्तार गरिरहेकाले विश्वका ठूला कार निर्माता कम्पनीहरू अब सस्तो र कम्प्याक्ट ईभी सेग्मेन्टमा केन्द्रित हुन थालेका हुन्।

विश्लेषकहरूका अनुसार आगामी केही महिनाभित्र विश्वव्यापी अटो निर्माता कम्पनीहरूले किफायती मूल्यका कम्प्याक्ट ब्याट्री–इलेक्ट्रिक गाडीहरूको लहर सार्वजनिक गर्नेछन्। यसको मुख्य उद्देश्य तीव्र गतिमा बढिरहेका चिनियाँ प्रतिस्पर्धीहरूसँग बजार हिस्सा जोगाउनु हो।

दक्षिण कोरियाको सिओल मुख्यालय रहेको किया कर्पोरेसनले आफ्नो नयाँ प्रवेश–स्तरको ईभी मोडल ईभी२ ब्रसेल्स मोटर शोमा सार्वजनिक गर्ने पुष्टि गरेको छ। कम्प्याक्ट अल–इलेक्ट्रिक एसयूभी ईभी२ हालसम्म कियाले ल्याएको सबैभन्दा सानो र सस्तो ईभी हो। यो मोडल युरोपमा मात्र बिक्री गरिनेछ र यसको मूल्य करिब ३० हजार युरो (करिब ३५ हजार अमेरिकी डलर) रहने अनुमान गरिएको छ। ईभी२ को उत्पादन कियाको स्लोभाकियास्थित कारखानामा हुनेछ र यस वर्ष उत्पादन क्रमशः बढाइने जनाइएको छ।

यसैबीच, जर्मनीको फक्सवागनले आफ्नो लोकप्रिय कम्प्याक्ट कार पोलोलाई पूर्ण विद्युतीय रूपमा पुनः ल्याउने तयारी गरेको छ। ‘आईडी.पाेलाे’ नाम दिइएको यो मोडल फक्सवागनको नयाँ एमईबी प्लस प्लेटफर्ममा आधारित हुनेछ। यो गाडी यसै वर्षको वसन्त ऋतुदेखि युरोपमा बिक्रीमा आउनेछ र यसको प्रारम्भिक मूल्य २५ हजार युरो तोकिएको छ।

रेनो, निसान, हुन्डाई र फोर्ड मोटरजस्ता अन्य अटो निर्माता कम्पनीहरूले पनि यस वर्ष थप किफायती ईभी मोडलहरू सार्वजनिक गर्ने योजना बनाएका छन्। फ्रान्सेली अटो निर्माता रेनोले यसै वर्षको सुरुवातमा ट्विङ्गोको नयाँ ब्याट्री–इलेक्ट्रिक संस्करण ल्याउने तयारी गरेको छ, जसको मूल्य २० हजार युरोभन्दा कम हुने अपेक्षा गरिएको छ। मिडिया रिपोर्टअनुसार सो मोडलमा प्रयोग हुने करिब ४० प्रतिशत कम्पोनेन्ट चीनमा उत्पादन गरिने भएकाले लागत घटाउन सहयोग पुगेको छ।

युरोपियन अटोमोबाइल म्यानुफ्याक्चरर्स एसोसिएसन (ACEA) को तथ्यांकअनुसार युरोपेली संघ, बेलायत र युरोपियन फ्री ट्रेड एसोसिएसन (EFTA) समेटिएको फराकिलो युरोपेली बजारमा गत वर्षको पहिलो ११ महिनामा कुल सवारी दर्ता १ करोड २१ लाख पुगेको छ, जुन अघिल्लो वर्षको तुलनामा २ प्रतिशतले बढी हो। यस अवधिमा ईभी मुख्य वृद्धिकारक बनेका छन्। ब्याट्री–इलेक्ट्रिक सवारीको बिक्री २७ प्रतिशतले बढेर २३ लाख युनिट पुगेको छ भने प्लग–इन हाइब्रिड ईभीको बिक्री ३३ प्रतिशतले वृद्धि भई १२ लाख युनिट पुगेको छ।

यस अवधिमा युरोपमा बिक्रीका आधारमा शीर्ष १० अटो ब्रान्डमध्ये दुईवटा चिनियाँ कम्पनी परेका छन्। एसएआईसी मोटर समर्थित एमजी आठौँ स्थानमा रहँदै २ लाख ७४ हजार युनिट बिक्री गर्न सफल भयो, जुन अघिल्लो वर्षको तुलनामा २६ प्रतिशतले बढी हो। बीवाईडी दशौँ स्थानमा रहँदै १ लाख ६० हजार युनिट बिक्री गरेको छ, जुन करिब चार गुणा वृद्धि हो।

एमजी र बीवाईडी मात्र होइन, कम आधार भएका अन्य चिनियाँ अटो निर्माता कम्पनीहरूले अझ तीव्र वृद्धि दर्ज गरेका छन्। अटोमोटिभ इन्टेलिजेन्स आपूर्तिकर्ता जाटो डायनामिक्सका अनुसार गत वर्ष अक्टोबरसम्म युरोपमा लिपमोटर टेक्नोलोजीको ईभी बिक्री अघिल्लो वर्षको तुलनामा ४१ गुणाभन्दा बढीले बढेको छ। त्यस्तै, चेरी होल्डिङ ग्रुप समर्थित ओमोडाको ईभी बिक्री सोही अवधिमा १२ गुणाले वृद्धि भएको छ।

चिनियाँ ब्रान्डको तीव्र विस्तार र कडा प्रतिस्पर्धाबीच युरोपेली बजार अब सस्तो र पहुँचयोग्य ईभीतर्फ तीव्र रूपमा अघि बढिरहेको देखिन्छ।