जिरो इन्जिनियरिङले सौराहा सम्म च्यारिटी सहितको राइड कार्यक्रम गर्दै

काठमाडौं – जिरो इन्जिनियरिङ मोटरसाइकलले काठमाडौँबाट सौराहा सम्मको राइड आयोजना गर्ने भएको छ । सो अवसरमा च्यारिटी कार्यक्रम समेत आयोजना गरिने छ ।

आगामी शुक्रबार देखि आइतबार सम्म हुने सो कार्यक्रममा विद्यालयको लागि च्यारिटी र आन्तरिक पर्यटन प्रवद्र्धन गर्ने हेतुले सौराहासम्मको राइड तयारी भएको हो।

चितवनको राप्ती नगरपालिका–३ मा रहेको श्री जनज्योति आधारभूत बिद्यालय धमिलीलाई सहयोग गर्ने उद्देश्यका साथ कार्यक्रम गर्ने पनि बताइएको छ। सो राइडमा १०० जना भन्दा बढीको सहभागिता रहने छ।

काठमाडौँबाट बाइरोड़को बाटो दामन हेटौडा हुँदै सौराहा सम्मको राइड रहेको बताइएको छ। सो राइडमा भाग लिने सवारीहरूले नेपालका अद्भुत प्राकृतिक दृश्यहरू, सांस्कृतिक विविधता र स्थानीय जीवनशैलीको अनुभव गर्ने अवसर पाउँछन्। यसको मुख्य उद्देश्य पर्यटन प्रवद्र्धन र ग्रुप मेम्बरहरुलाई रिफ्रेसमेन्ट उपलब्ध गराउनु रहेको छ।

सौराहा नेपालको चितवन जिल्लामा अवस्थित एक प्रमुख पर्यटकीय स्थल हो, जुन चितवन राष्ट्रिय निकुञ्जको प्रवेशद्वारको रूपमा परिचित छ। सौराहाका प्रमुख आकर्षणहरूलाइ नियाल्न र त्यहाँको प्राकृतिक सौन्दर्यको आनन्द लिन को लागि यस राइडको आनन्द लिन सकिने छ।