घरमै इलेक्ट्रिक सवारी साधन चार्ज गर्दा ध्यान दिनुपर्ने कुराहरु, यी गल्तीले ठुलो क्षति हुन सक्छ

धेरै प्रयोगकर्ताहरूले घरमै आफ्नो सवारी साधन चार्ज गर्ने गरेका छन् । तर घरमै चार्ज गर्दा केही महत्त्वपूर्ण सावधानी अपनाउन नसके दुर्घटना वा ठुलो क्षति हुने जोखिम रहन्छ।

इलेक्ट्रिक सवारी साधन चार्ज गर्दा सबैभन्दा पहिले चार्जिङ केबलको अवस्थाबारे नियमित रूपमा जाँच गर्नु आवश्यक हुन्छ। यदि केबल कतैबाट च्यातिएको, काटिएको वा प्लग खुकुलो भएको देखिएमा त्यस्तो केबल प्रयोग गर्नु हुँदैन।

चार्ज गर्ने क्रममा तार वा प्लग अत्यधिक तातो भएमा त्यसलाई तुरुन्तै परिवर्तन गर्नु सुरक्षित हुन्छ। राम्रो अवस्थामा रहेको चार्जिङ सिस्टमले ब्याट्रीको आयु बढाउनुका साथै सर्ट सर्किटको जोखिम पनि कम गर्छ।

घरमा चार्ज गर्दा धेरै मानिसहरूले एक्सटेन्सन कर्ड प्रयोग गर्ने गर्छन्, तर यो तरिका सुरक्षित मानिँदैन। इलेक्ट्रिक सवारी साधन पूर्ण रूपमा चार्ज हुन लामो समय लाग्ने भएकाले एक्सटेन्सन कर्ड लामो समयसम्म प्रयोग गर्दा अत्यधिक तात्ने सम्भावना हुन्छ। यसले तार जल्ने वा आगलागी हुने जोखिम बढाउन सक्छ। त्यसैले चार्जरलाई सिधै बलियो र उच्च गुणस्तरको भित्तामा जडान गरिएको सकेटमा जोड्नु नै सबैभन्दा सुरक्षित उपाय मानिन्छ।

सवारी साधन निर्माता कम्पनीले उपलब्ध गराएको चार्जर प्रयोग गर्नु अत्यन्त महत्वपूर्ण हुन्छ। निर्माता कम्पनीको चार्जर गाडीको ब्याट्री व्यवस्थापन सिस्टमसँग मिल्ने गरी डिजाइन गरिएको हुन्छ, जसले ब्याट्रीलाई सुरक्षित रूपमा चार्ज गर्न मद्दत गर्छ। सस्तो वा स्थानीय रूपमा बनाइएका चार्जर प्रयोग गर्दा गाडी अत्यधिक तात्ने र आगलागी हुने जोखिम बढ्न सक्छ। सही चार्जर प्रयोग गर्दा ब्याट्री लामो समयसम्म सुरक्षित र टिकाउ रहन्छ।

अधिकांश आधुनिक इलेक्ट्रिक सवारी साधनमा ब्याट्री १०० प्रतिशत चार्ज भएपछि अटोमेटिक रूपमा चार्ज बन्द हुने व्यवस्था हुन्छ। यद्यपि यस्तो सुविधा भए पनि सवारी साधनलाई लामो समयसम्म प्लगमा जोडेर राख्नु उचित मानिँदैन। ब्याट्री पूर्ण रूपमा भरिएपछि पनि घण्टौंसम्म चार्जरमा जोडेर राख्दा ब्याट्रीको स्वास्थ्यमा नकारात्मक प्रभाव पर्न सक्छ।

चार्ज गर्ने स्थान पनि उत्तिकै महत्वपूर्ण हुन्छ। इलेक्ट्रिक सवारी साधन चार्ज हुने ठाउँ सधैं सुख्खा र सुरक्षित हुनुपर्छ। चार्ज गर्दा उत्पन्न हुने ताप बाहिर निस्कन सक्ने गरी उचित हावा चल्ने व्यवस्था पनि हुन आवश्यक छ। वर्षा वा मनसुनको मौसममा पार्किङ स्थानमा पानी जमेको छैन भन्ने सुनिश्चित गर्नु जरुरी हुन्छ। यदि स्कुटरको ब्याट्री निकालेर चार्ज गर्नुपरेमा त्यसलाई भुइँमा नराखी टेबल वा र्‍याकजस्तो उचाइ भएको सुरक्षित स्थानमा राखेर चार्ज गर्नु उत्तम मानिन्छ।