२५० सीसी माथिका मोटरसाइल मात्र बिक्री गर्ने यी तीन ब्रान्डलाई बजेटले थप्यो चुनौती

बजेटमा सरकारले २ सय सीसी माथिका मोटरसाइकलमा यसअघि लाग्दै आएको भन्सार र अन्तःशुल्कमा भारी मात्राले वृद्धि गरेको छ । यससँगै यो सेग्मेन्टका मोटरसाइकलको मूल्य समेत उच्च मात्राले बढ्ने देखिएको छ । २०१ देखि २५० सीसी सम्मका मोटरसाइकलमा २० प्रतिशतले अन्तःशुल्क र १० प्रतिशतले भन्सार बढाएको सरकाले २५१ देखि ५०० सीसीसम्मको हकमा भने भन्सार ४० प्रतिशत र अन्तःशुल्क १० प्रतिशतले वृद्धि गरेको छ ।

यति धेरै दरमा भन्सार र अन्तःशुल्क बढेपछि हाल बजारमा ३ सय भन्दा माथि सीसीका मोटरसाइकल मात्र बिक्री गर्दै आइरहेका ३ ब्रान्ड रोयल इन्फिल्ड, बीएमडब्लु र जावाको बजार थप चुनौतीपूर्ण हुने देखिएको छ । यी ब्रान्डको मोटरसाइकलमा ठूलो रकम वृद्धि हुने हुँदा बजारमा माग क्रमशः कम हुँदै जाने देखिन्छ । वार्षिक ८ हजार हाराहारी संख्यामा बिक्री हुँदै आइरहेको यो सेग्मेन्टको बजारमा बजेटले ठूलै चुनौती थपिएको सहजै अनुमान लगाउन गाह्रो हुँदैन ।

हाल बजारमा रोयल इन्फिल्डसँग ३४६ देखि ६५० सीसी सम्मका मोटरसाइकलमात्र उपलब्ध रहँदै आइरहेको छ । यी मोटरसाइकललाई यसअघिको डिलर एमभी दुगड समुहले ४ लाख ६७ हजारदेखि १२ लाख ५० हजार रुपैयाँसम्ममा बिक्री गर्दै आइरहेको थियो । दुगडलाई हटाएर नयाँ डिलरका रुपमा त्रिवेणी समुह अन्तर्गतको अल्फा अटोमोटिभ्स नियुक्त भएपनि यो कम्पनीले हालसम्म बिक्री प्रारम्भ गरेको छैन ।

यसैगरी जावा मोटरसाइकलको नेपालमा लागि आधिकारिक वितरक अग्नि मोटोइंक प्रालिले यसको तीनवटा मोडल जावा फोर्टी टु, क्लासिक र पेराक आयात गरी कारोबार गर्दै आइरहेको छ । यी मध्ये फोर्टी टु र क्लासिकमा २९३ सीसी क्षमताको इन्जिन जडान गरिएको छ भने पेराकमा ३३४ सीसी क्षमताको इन्जिन जडान भएको छ । यी मोटरसाइकलमो मूल्य ६ लाख ४८ हजार रुपैयाँदेखि ८ लाख २० हजार रुपैयाँसम्म कायम गरिएकोमा यसपछि ४० प्रतिशत भन्सार र १० प्रतिशत अन्तःशुल्क वृद्धि हुँदा मूल्य भारी मात्रामा बढ्ने देखिन्छ ।

बीएमडब्लु बाइकको नेपालका लागि आधिकारिक वितरक हिमालयन मोटोरार्डले जी ३१० आर र जी ३१० जीएस गरी कुल दुईवटा मोडलका मोटरसाइकल आयात गरी कारोबार गर्दै आइरहेको छ । यी मोटरसाइकलमा ३१३ सीसी क्षमताको इन्जिन जडान गरिएको हुँदा यसमा पनि ४० प्रतिशत भन्सार र १० प्रतिशत अन्तःशुल्क वृद्धि हुनेछ । यी मोटरसाइकलको मूल्य हाल ९ लाख ५० हजारदेखि १४ लाख ७५ हजार रुपैयाँसम्म तोकिएको छ ।