नेपालमा उपलब्ध सीएफ मोटो ब्रान्ड भारतमा पुनः प्रवेश गर्दै, ४५० एमटी आकर्षण हुने

नेपाली बजारमा राम्रो प्रतिक्रिया पाइरहेको सीएफ मोटो ब्रान्ड भारतमा पुनःप्रवेश गर्ने भएको छ । सन् २०१९ मा केही समय मात्र बिक्री भएको सो बाइकको बिक्री बन्द भए पश्चात अब फेरि बिक्री शुरु हुने भएको हो ।

भारतमा लागू भएको बीएस६ नियम अनुसार सो बाइकको बिक्री बन्द भएको थियो । भारतको हैदराबादस्थित एएमडब्लू मोटरसाइकलको माध्यमबाट यसको बिक्री भएको थियो । अब भने कम्पनीले नयाँ तरिकाले यसको बिक्री शुरु गर्ने भएको छ ।

यही वर्षको मध्य देखि यसको बिक्री सुरु हुने अनुमान गरिएको छ । ग्लोबल बजारमा धुम मचाइरहेको सीएफ मोटो ब्रान्ड नेपालमा भने उपलब्ध छ । नेपालमा रिलायन्स ग्रुप अन्तर्गतको ऋषि ट्रेड सेन्टरले यसको बिक्री–वितरण गरिरहेको छ ।

नेपालमा राम्रो चर्चा पाइरहेको सीएफ मोटो ४५० एमटी एड्भेन्चर बाइक भारतमा लन्च हुने बताइएको छ । यसमा प्यारालल ट्विन इन्जिन रहेको छ । यसमा ह्विल सेटअप, २०० एमएमको सस्पेन्सन ट्राभल र ८०० एमएमको सिट हाइट सहित प्रभावशाली अफरोड क्षमता छ ।

त्यसैगरी ६७५ सीसी इन–लाइन थ्री सिलिन्डर इन्जिनयक्त बाइक समेत भारतीय बजारमा उपलब्ध हुने अनुमान पनि मिडियाहरुले गरेका छन् । यसमा स्ट्रिट नेकेड र सुपरस्पोर्ट बाइकका रेन्ज छन् ।

भारतमा यो बाइक लन्च भएमा रोयल इन्फिल्डका मोटरसाइकलसँग विशेष प्रतिस्पर्धा हुने अनुमान गर्न सकिन्छ ।