सीएफमोटो १५० एनके सोल्ड आउट, अब बढी मूल्य सहित नयाँ ग्राफिक्समा

काठमाडौं – नेपाली बजारमा उपलब्ध सीएफमोटो १५० एनके सोल्ड आउट भएको छ । नेपालका लागि सीएफमोटो बाइकको आधिकारिक वितरक अन्ना इन्टरनेसनलले अब नयाँ ग्राफिक्स सहितको १५० एनके बाइक उपलब्ध गराउने भएको छ ।

कम्पनी स्रोतका अनुसार ग्रे र ब्लु कलरको नयाँ १५० एनके अब नेपाली बजारमा उपलब्ध हुनेछ । यसको मूल्य ३ लाख ३५ हजार ५ सय रुपैयाँ तोकिएको छ । यो भन्दा पहिलेको एनके १५० को मूल्य ३ लाख २१ हजार ५ सय थियो । सरकारले विभिन्न करको दरमा गरेको परिमार्जनले समेत यसमा असर पुगेको बताइएको छ ।

सीएफमोटो सोरुममार्फत यो बाइक बुकिङ गर्न सकिन्छ । ग्राफिक्स वाहेक अन्य फिचर भने यथावत रहेका छन् ।

१५० एनकेमा १४९ सीसी सिगंल सिलिन्डर, लिक्विडकुल्ड इएफआई इन्जिन रहेको छ, जसले १४ बीएचपी पावर तथा १२.२ एनएम टर्क जेनेरेट गर्छ । ६ स्पिडको ट्रान्समिसन रहेको यो बाइक १० लिटरको क्षमताको फ्यूल ट्यांक रहेको छ । सीएफमोटो १५०एनके बाइकमा अल डिजिटल डिस्प्ले, स्टाइलिस एलईडी डीआरएल, ईएफआई तथा ईसीयू सिष्टम र विभिन्न प्रकारका राइडिङ मोड उपलब्ध छ ।

आकर्षक सार्प लुक्स भएको यो बाइकमा एग्रेसिब हेडल्याम्प, दुई पिस सिट, लो पोजिसन राइडर सिट, स्पोर्ट्स तथा इकोनोमी राइडिङ अप्सन, ४० किलोमिटर माइलेज जस्ता बिशेषता रहेको छ । मोटरसाइकलमा सुरक्षालाई मध्यनजर गर्दै फ्रन्टमा २९२ एमएमको ट्विन पिस्टन क्यालिपर र रियरमा २२० एमएमको सिंगल पिस्टन क्यालिपर ब्रेक दिइएको छ । १५० एनकेको फ्रन्टमा यूएसडी टेलिस्कोप फ्रर्क र रियरमा सिंगल मोनेशक रहेको छ ।

युरो फाइभ मापदण्डमा आधारित इन्जिन भएको यो बाइकमा चेन स्पोकेट, मिरर र एक्जस्ट सिस्टम पहिले भन्दा रिफाइन भएर आएको छ ।