१८० एमएम माथी ग्राउन्ड क्लिरियन्स भएका तीन सस्ता कार

सामन्यत गाडी किन्ने ग्राहकले उक्त गाडीको लुक्स तथा डिजाइन, पावर तथा पर्फमेन्स र सेफ्टी तथा कम्फर्ट फिचर्समा बढी जोड दिने गर्छन् । तर अधिकांश सडक जीर्ण भएका कारण नेपालमा भने ग्राउन्ड क्लिरियन्सले समेत गहन भुमिका खेल्ने गरेको छ । कम ग्राउन्ड क्लिरियन्स भएका गाडीलाई कच्ची सडकमा गुडाउँदा नोक्सानी हुने सम्भावनाका कारण पनि ग्राउन्ड क्लिरियन्स बढी भएका कार रोजाइमा पर्न थालेको हो ।

नेपाली बजारमा इन्ट्रि लेभल ह्याचब्याकलाई सबैभन्दा सस्तो कारका रुपमा लिने गरिएको छ । प्रायः मध्यम र निम्न मध्यम स्तरको आय भएका र पहिलो पटक प्रयोग गर्न गैरहेका ग्राहकले यस्ता कार बढी मात्रामा खरिद गर्ने गर्छन् । यस्ता कार खरिद गर्दा समेत ग्राहकले ग्राउन्ड क्लिरियन्स भने बढी नै भएको खोज्ने गरेका छन् । हाल बजारमा उपलब्ध यो सेग्मेन्टका कारमा सबैभन्दा बढी ग्राउन्ड क्लिरियन्स ड्याटसन रेडीगोमा दिइएको छ । १ हजार सिसी क्षमता इन्जिन जडान गरिएको रेडी गोमा १८७ एमएम ग्राउन्ड क्लिरियन्स दिइएको छ । ६७ बिएचपी पावर र ९१ एनएम टर्क भएको रेडी गोको म्यानुअललाई २४ लाख ४९ हजार र अटोमेटिकलाई २५ लाख ९९ हजार रुपैयाँ पर्छ ।

रेडी गोपछि दोस्रो सर्बाधिक बढी ग्राउन्ड क्लिरियन्स भएको अर्को कार हो रेनो क्विड । १ हजार सीसी क्षमताको इन्जिन जडान गरिएको यो कारमा १८४ एमएम ग्राउन्ड क्लिरियन्स दिइएको छ । यो कारको अधिकतम पावर ६७ बिएचपी र टर्क ९१ एनएम रहेको छ । म्यानुअल र अटोमेटिक दुबै अप्सनमा उपलब्ध यसको मूल्य २५ लाख ४९ हजारदेखी २६ लाख ९९ हजार रुपैयाँसम्म निर्धारण गरिएको छ ।

त्यसैगरी मारुती सुजुकी एसप्रोसोमा १८० एमएम ग्राउन्ड क्लिरियन्स दिइएको छ । १ हजार सीसी क्षमताको इन्जिन जडान गरिइको यो कारको लुक्स एसयुभी प्रेरित छ । जसको अधिकतम पवार ६७ बिएचपी र टर्क ९० एनएम रहेको छ । यो कारको मूल्य नेपाली बजारमा २३ लाख ४९ हजारदेखी २६ लाख ५९ हजार रुपैयाँसम्म पर्छ ।