जापानकै लागि भनेर केई कार उत्पादन गर्दै बीवाईडी

चिनियाँ ईभी नर्माता बीवाईडीले जापानी बजारकै लागि भनेर केई (मिनी कार) विद्युतीय कार विकास गर्ने भएको छ । अहिलेसम्म जापानका घरेलु उत्पादकहरूले मात्र केई कारहरू बनाउँदै आएकोमा बीवाईडीले पहिलोपटक यस्तो कार उत्पादन गर्न लागेको हो ।

जापानी भाषामा मिनी कार वा केई–जी दोशा (हल्का सवारी साधन) ले जापानी कार बजारको लगभग ४० प्रतिशत हिस्सा ओगटेका छन् । केई कारहरूको अद्वितीय मापदण्डका कारण, अहिलेसम्म कुनै पनि विदेशी कार निर्माताले जापानमा यो सेग्मेन्टमा आफ्नो पहुँच पाउन सकेको छैन ।

मिडिया रिपोर्टक अनुसार बीवाईडीले नयाँ विद्युतीय कारको डिजाइन पूरा गरिसकेको छ । यो जापानमा विशेष रूपमा उपलब्ध हुनेछ र २०२६ को मध्येतिर लन्च हुने तय भएको छ । नयाँ कारको अनुमानित मूल्य १७ हजार ७०० अमेरिकी डलर पर्ने अनुमान गरिएको छ ।

बीवाईडीको बिक्री विश्वव्यापी रुपमा बृद्धि भइरहेको समयमा आएको यस कदमले दक्षिणपूर्बी एसियामा समेत ब्रान्डको पहुँच थप मजवुत बन्दै जाने विश्वास लिइएको छ । सन् २०२३ मा जापानी बजारमा प्रवेश गरेको बीवाईडीले हालसम्म जम्मा ४ हजार ५३० युनिट कार बिक्री गरेको छ । केई कार सेग्मेन्टमा प्रवेश गरेर उसले जापानमा आफ्नो हिस्सा बजार बढाउने रणनिती अपनाएको हो ।

चीनमा बिक्री हुने मोडललाई विश्वव्यापी बजारमा बिक्री गर्दै आएको बीवाईडीले पहिलो पटक कुनै निश्चित देशका लागि विशेष रूपमा कार विकास गर्न लागेको हो ।

केई वा मिनी–कारहरूलाई ३.४ मिटर वा कम लम्बाइ र १.४८ मिटर वा कम चौडाइको रूपमा परिभाषित गरिएको छ । यी कारहरुमा सरकारले कर छुट दिने कारण मूल्य समेत कम पर्छ । जापानमा हाल निसानले साकुरा र मित्सुबिशी एक एक्स मोडलका केई ईभी उत्पादन गरी बिक्री गर्दै आएका छन् ।