हुन्डाई र कियाको बजार चिर्न बीवाईडीले कोरियामा दोब्बर सेल्स नेटवर्क बनाउँने, देखायो अर्को मोडल

दक्षिण कोरियाली बजारमा रहेको हुन्डाई र कियाको बजारलाई चिर्नका लागि चिनियाँ अटो निर्माता कम्पनी बीवाईडीले आफ्नो सेल्स नेटवर्कलाई बढाउने बताएको छ ।

बीवाईडीको एसिया प्यासिफिक अटो सेल्स डिभिजनका जनरल म्यानेजर लिउ स्वेलियाङले कोरियाली ग्राहकको चाहना अनुसार हाल भइरहेको १५ सेल्स नेटवर्कलाई बढाएर यो वर्ष भित्रै ३० पु¥याउने बताए । दक्षिण कोरियाको इल्सान सिटीमा चलिरहेको सिउल मोबिलिटी शोको सन्दर्भमा उनले सो कुरा बताएका हुन् ।

बीवाईडी दक्षिण कोरियाली बजारमा प्रवेश गरेको धेरै लामो समय भने भएको छैन । गत जनवरीमा बीवाईडीले बीवाईडी एट्टो ३ इलेक्ट्रिक एसयूभीका साथ बीवाईडी प्रवेश गरेको थियो । आक्रामक बजार र मूल्य रणनीतिका लागि परिचित चिनियाँ कम्पनी बीवाईडीका लागि दक्षिण कोरियाली बजार भने कठिन नै हुने अनुमान गरिएको छ ।

दक्षिण कोरियाका घरेलु कार निर्माता कम्पनी हुन्डाई र कियाले गत वर्ष १२ लाख कार बिक्री गरेका थिए र उनीहरुको बजार हिस्सा ७५ प्रतिशत छ ।

हाल चलिरहेको सिउल मोबिलिटी शोमा बीवाईडीले सिल मिड–साइज सेडान सार्वजनिक गरेको छ । सबै छुट कटाएर यसको मूल्य ४ करोड ७५ लाख वन अर्थात ३२ हजार ४०० डलर छ । यी वाहेक बीवाईडीले सबै गरी ६ मोडल सोकेस गरेको छ ।

बीवाईडीले यो वर्ष विभिन्न नयाँ प्रविधि समेत सार्वजनिक गरिरहेको छ । केही समय पहिले मात्र उही मूल्यमा गड्स आई नामक स्मार्ट ड्राइभिङ टेक्नोलोजी उपलब्ध गराउने घोषणा गरेको छ भने ५ मिनेट चार्ज गर्दा ४०० किलोमिटर गुड्न सक्ने अल्ट्रा–फास्ट चार्जिङ सिस्टम सार्वजनिक गरेको छ ।