बीवाईडीका गाडी आइएमई जनरल इन्स्योरेन्समा बिमा गरिने, सहज भुक्तानीको सुविधा हुने

काठमाडौं – आइएमई जनरल इन्स्योरेन्स र नेपालका लागि बीवाईडीको आधिकारिक वितरक साइमेक्स इंक बीच बिमा सम्बन्धी सम्झौता सम्पन्न भएको छ । सम्झौतापत्रमा आइएमई जनरलका प्रमुख कार्यकारी अधिकृत युगेशभक्त बादे श्रेष्ठ र साइमेक्स इंक बीवाईडीका सहायक महाप्रबन्धक आकाशविक्रम थापाले हस्ताक्षर गरेका छन् ।

सम्झौता अनुसार बीवाईडी ब्रान्डका सवारीसाधनको बिमा गरेका ग्राहकले कुनै किसिमको दुर्घटनाबाट सवारीसाधनको क्षति भएमा सेवा लिन सक्नेछन् । कम्पनीबाट बिमा गरेपछि सवारीसाधन दुर्घटनामा परी क्षति भएमा सोको सहज र सरल तरीकाले नगदरहित दाबी भुक्तानी गर्न सकिने कम्पनीको भनाइ छ ।

कुनै प्रकारको दुर्घटना भएमा वान विन्डो पोलिसी बमोजिम सबै कार्य साइमेक्स इंकमार्फत गरिने र ग्राहकलाई बिमा दावीका लागि कुनै समस्या नहुने बताइएको छ ।