बीएस६ इन्जिन र नयाँ फिचर सहित सार्वजनिक भयो फोर्सको नयाँ गोर्खा

भारतमा फोर्सको नयाँ गोर्खा सार्वजनिक भएको छ । बीएस६ इन्जिनयुक्त फोर्सको उक्त नयाँ एसयूभीको मूल्य भने आगामी सेप्टेम्बर २७ मा सार्वजनिक हुनेछ । डेलिभरी पनि त्यही दिन देखि शुरु हुनेछ ।

२०२० अटो एक्सपोमै कन्सेप्ट भर्सन सार्वजनिक गरिएको फोर्स गोर्खाको प्रोडक्सन भर्सन बल्ल सार्वजनिक गरिएको हो । सन् २०२० मे महिनामै सार्वजनिक गर्ने भनिए पनि कोरोना भाइरस संक्रमणका कारण यति ढिलाई हुन गएको हो ।

पुरानो भर्सनको तुलनामा नयाँ भर्सनमा केही कस्मेटिक र मेकानिकल परिवर्तन गरिएको छ भने केही फिचर समेत थप भएका छन् ।

नयाँ गोर्खामा इन्जिन पनि नयाँ राखिएको छ । यसमा २.६ लिटरको डिजेल इन्जिन छ, जसले ९१ एचपी पावर र २५० एनएम टर्क जेनेरेट गर्छ । यसमा फोर बाई फोर लो मोड छ भने ७०० एमएम वाटर वेडिङ डेप्थ छ ।

नयाँ गोर्खामा एलईडी लाइट र एलईडी डीआरएल, स्मार्टफोन कनेक्टिभिटी सहितको टचस्क्रिन इन्फोटेनमेन्ट सिस्टम, टीपीएमएस र कर्नरिङ हेडल्याम्प जस्ता नयाँ इक्विपमेन्ट उपलब्ध छन् ।

यसको इन्टेरियरमा पनि व्यापक परिवर्तन गरिएको छ । पहिले भन्दा लामो र फराकिलो भएकाले क्याबिन पनि फराकिलो छ । सबै चार प्यासेन्जरका लागि यसमा फ्रन्ट फेसिङ क्याप्टेन सिट छ । यसमा एन्ड्रोइड अटो र एप्पल कारप्ले सपोर्ट गर्ने टचस्क्रिन इन्फोटेनमेन्ट सिस्टम सहितको ड्यासबोर्ड छ । त्यसैगरी टिल्ट एन्ड टेलिस्कोपिक स्टेयरिङ ह्विल, पावर विन्डो आदि छन् । त्यसैगरी ड्युअल फ्रन्ट एयरब्याग, ईबीडी सहितको एबीएस, रियर पार्किङ सेन्सर आदि फिचर छन् ।

फोर्सको नयाँ गोर्खा नेपाली बजारमा पनि आउने सम्भावना छ । नेपालका लागि फोर्स मोटर्सको आधिकारिक वितरक हिमालय अर्गनाइजेसन अन्तर्गतको आयाम इन्टरकन्टिनेन्टल प्रालिले यो गाडी नेपाली बजारमा उपलब्ध गराउने बताइसकेको छ ।

नेपाली बजारमा समेत उपलब्ध भएमा फोर्सको नयाँ गोर्खा र महिन्द्राको नयाँ थार बीच प्रतिस्पर्धा हुनेछ । महिन्द्राले नेपाली बजारमा पहिले नै उपलब्ध गराउने बताए पनि भारतमा समेत थारको धेरै माग भएकाले अहिले सम्म उपलब्ध हुन सकेको छैन ।