पल्सर एन१६० र एन२५० को खुल्यो बुकिङ, यस्तो छ मूल्य

काठमाडौं – बजाज पल्सर एन१६० र एन२५० को बुकिङ खुल्ला गरिएको छ । नेपालका लागि बजाजको आधिकारिक वितरक हंसराज हुलासचन्द एन्ड कम्पनीले यी दुई बाइकको बुकिङ खुल्ला भएको बताएको छ ।

विभिन्न सोरुमहरुमार्फत यी बाइक बुकिङ गर्न सकिने छ । पल्सर एन१६० को मूल्य ३ लाख ७९ हजार ९ सय र एन२५० को मूल्य ४ लाख ८९ हजार ९ सय रुपैयाँ तोकिएको छ ।

हाल नेपाली बजारमा १५० सीसी भन्दा माथिका मोटरसाइकल आयात गर्न पाइदैन । तर बजाजका बाइक नेपालमै एसेम्बल हुने भएकाले कम्पनीलाई असर परेको छैन ।

पल्सर एन१६० नेकेड स्पोर्ट बाइक हो । नयाँ बजाज पल्सर एन१६० मा पहिले जस्तै १६४.८२ सीसी, सिंगल सिलिन्डर इन्जिन प्रयोग गरिएको छ, जसले १६ बीएचपीको अधिकतम पावर र १४.६५ एनएमको अधिकतम टर्क जेनेरेट गर्छ । सो इन्जिनमा ५ स्पिड गियरबक्स जडान गरिएको छ । ड्युअल च्यानल भेरिएन्टमा ३०० एमएम फ्रन्ट डिस्क र सिंगल च्यानल भेरिएन्टमा २८० एमएम फ्रन्ट डिस्क जडान गरिएको छ ।

पल्सर एन२५० को केही डिजाइन पल्सर एनएस२०० जस्तै राखिएको छ । बाइकको स्टाइलिङमा प्रमुख फ्रन्ट फेसिया हो, जसमा स्लिम एलईडी डीआरएलले घेरिएको एलईडी प्रोजेक्टर समावेश छ । यसमा शार्प फ्युल ट्यांक एक्सटेन्सन, स्लीक र रेक्ड टेल सेक्सनले बाइकलाई आक्रामक बनाएको छ ।

बजाज पल्सर एन२५० मा नयाँ २५०सीसी, आयल–कूल्ड इन्जिन समावेश गरेको छ । जसले २४.१ बीएचपीको पावर र २१.५ एनएम टर्क जेनेरेट गर्छ । इन्जिनमा ५ स्पिड गियरबक्स जोडिएको छ ।