सोसल मिडियामा बीएमडब्ल्युको म्याक्सी स्कुटर सार्वजनिक, यस्तो छ विशेषता

बीएमडब्ल्यु मोटरराडले भारतीय बजारमा नयाँ म्याक्सी स्कुटर लन्च गर्ने तयारी गरिरहेको छ । कम्पनीले सो स्कुटरको टिजर सार्वजनिक गरेको छ । टिजरमा यसको क्याप्सनमा शहरी सवारीको पछिल्लो तहमा पुग्न तयार हुनुहुन्छ भन्ने लेखिएको छ । यद्यपि कम्पनीले नयाँ बीएमडब्ल्यु म्याक्सी स्कुटरको नाम र विवरण खुलाएको छैन । विश्वव्यापी प्रोडक्सन पोर्टफोलियोबाट बीएमडब्ल्यु सी४०० जीटी हुने विश्वास गरिएको छ ।

सो स्कुटरमा एलईडी लाइटिङ सिस्टम, स्पोर्टी भि–शेपको ट्रिम प्यानल, ठूलो ढाँचाको विन्डस्क्रिन, एर्गाेनोमिक रूपमा डिजाइन गरिएका सिट र अन्य सुविधा समावेश गरिएको छ । सो स्कुटर नयाँ ब्रेक र परिमार्जित स्वचालित स्टेबिलिटी कन्ट्रोलको साथमा उपलब्ध रहेको छ । सो स्कुटर भारतमा लन्च गरिएमा यसको मूल्य ६ लाख भारु भन्दा बढी हुने अनुमान गरिएको छ । सो स्कुटर आगामी सेप्टेम्बर वा अक्टोबर महिनामा भारतमा लन्च हुने अनुमान गरिएको छ ।

विश्वव्यापी रूपमा बीएमडब्ल्यु सी ४०० जीटी एक नयाँ ई–ग्याँस प्रविधिको ३५० सीसी, सिंगल सिलिन्डर लिक्विडकुल्ड इन्जिनको साथमा उपलब्ध हुनेछ । साथै २०२१ मोडलमा क्याटालिटिक कन्भर्टर, परिमार्जित सिलिन्डर हेड, नयाँ अक्सिजन सेन्सर र परिमार्जित निकास प्रणालीको साथ उपलब्ध हुनेछ । सो स्कुटरले ३३.५ बीएचपीको पावर र ३५ एनएमको टर्क जेनेरेट गर्छ । यो स्कुटरले १३९ किलोमिटरको उच्च गति प्रदान गर्छ ।

नयाँ बीएमडब्ल्यु म्याक्सी स्कुटरमा सीभीटी अटोमेटिक गियरबक्स रहेको छ । गियरबक्स युनिटलाई नयाँ क्लच स्प्रिङको साथमा अपडेट गरिएको छ, जसलाई यसको शार्प थ्रोटल प्रतिक्रिया र स्मुथर पावर डेलिभरका लागि चिनिन्छ । बीएमडब्ल्यु सी ४०० जीटी तीन कलर स्किम अल्पाइन ह्वाइट, मुनवाक ग्रे मेटालिक र ब्ल्याकस्टोर्म मेटालिकमा उपलब्ध हुनेछ ।