टीभीएस अपाचे आरआर३१० सँग प्रतिस्पर्धा गर्न बीएमडब्ल्यु जी३१० आरआर आउने

बीएमडब्ल्युले आफ्नो आगामी बाइकको एउटा टिजर जारी गरेको छ । यो कम्पनीको जी३१० आर स्ट्रिट फाइटरको पूर्ण रूपमा फेयर, स्पोर्ट्सबाइक भर्सन जस्तो देखिन्छ । नयाँ मोडल जुलाई १५ मा लन्च गर्ने सम्भावना रहेको छ र टीभीएस अपाचे आरआर३१० को रिब्याज गरिएको भर्सन जस्तो देखिन्छ ।

टिजरमा देखिए अनुसार बीएमडब्ल्युको नयाँ बाइकको एलईडी टेललाइटको डिजाइन टीभीएस अपाचे आरआर३१० सँग मिल्दोजुल्दो छ । बाइकको अन्य डिजाइन पनि अपाचेसँग मिल्दोजुल्दो छ । टिजरमा यसको इन्स्ट्रयुमेन्ट कन्सोल छोपिएको छ तर यो नयाँ मोडलमा टीभीएस स्पोर्ट्स बाइक जस्तै समान टीएफटी युनिट हुने आशा गरिएको छ । बीएमडब्ल्यु जी३१० आर र जी३१० जीएसमा जस्तै यसमा मोनोक्रोम एलसीडी इन्स्ट्रयुमेन्ट कन्सोल उपलब्ध हुनेछ ।

नयाँ बीएमडब्ल्यु जी३१०आरआर चाहिं टीभीएस अपाचे आरआर३१० मा जस्तै ३१२ सीसी, लिक्विड–कुल्ड, सिंगल सिलिन्डर इन्जिनद्वारा संचालित हुनेछ । यो रिभर्स इन्क्लाइन इन्जिनले ‘स्पोर्ट’ र ‘ट्रयाक’ मोडमा क्रमशः ३४ पीएस पावर र २७.३ एनएम टर्क जेनेरेट गर्ने क्षमता रहेको छ । यसको ‘रेन’ र ‘अर्बन’ मोडमा २५.८ पीएस पावर र २५ एनएम टर्क जेनेरेट गर्छ ।

Adrenaline incoming!#ComingSoon #StayTuned #NewLaunch #RR #NeverStopChallenging pic.twitter.com/1DMl7AL31T

— BMWMotorrad_IN (@BMWMotorrad_IN) June 3, 2022

सो बाइकमा स्लिपर क्लचको साथ ६ स्पिड ट्रान्समिसन रहेको छ । बीएमडब्ल्युको हालको ३१० सीसी मोडलमा राइडिङ मोड उपलब्ध छैन तर निकट भविष्यमा बीएमडब्ल्यु जी३१० आरआरको लन्चिङ पछि राइडिङ मोड र टीएफटी इन्स्ट्रयुमेन्ट कन्सोलसँग अपडेट गरिनेछ ।

टिजरका अनुसार बीएमडब्ल्युको नयाँ ३१० स्पोर्ट्स बाइकमा ब्रान्डको सिग्नेचर कलर हुने स्पष्ट देखिन्छ । जसमा सेतो र रातो, निलो र भायोलेट हाइलाइट समावेश छन् ।