टीभीएस अपाचे आरआर ३१० को प्रतिस्पर्धामा आयो बीएमडब्ल्युको नयाँ बाइक

बीएमडब्ल्यु मोटरार्डले भारतीय बजारमा जी ३१० आरआर स्पोर्ट बाइक लन्च गरेको छ । सो बाइक स्ट्यान्डर्ड र स्टाइल स्पोर्ट गरी दुई भेरिएन्टमा सार्वजनिक गरिएको हो । यसको मूल्य क्रमशः २ लाख ८५ हजार र २ लाख ९९ हजार भारु तोकिएको छ ।

हेर्दा टीभीएस अपाचे आरआर ३१० जस्तो लाग्ने यो बाइकको धेरै फिचर टीभीएसको सो बाइकसँग मिल्दोजुल्दो पनि छ । कम्पनीले यसलाई विभिन्न कलर अप्सनमा उपलब्ध गराएको छ ।

यसमा अपाचे आरआर ३१० मा प्रयोग भएकै ३१३ सीसी, सिंगल सिलिन्डर फ्युल इन्जेक्टर इन्जिनको प्रयोग गरिएको छ, जसले ३३.५ बीएचपी पावर र २७.३ एनएम टर्क जेनेरेट गर्छ ।

इन्जिनलाई ६–स्पिड गियरबक्ससँग जोडिएको छ । यसका साथै अपाचेमा उपलब्ध ब्लुटुथ कनेक्टिभिटी, राइड बाई वायर, टर्न बाई टर्न नेभिगेसन र चार राइडिङ मोड – अर्बन, ट्रयाक, स्पोर्ट र रेन जस्ता फिचर यो बाइकमा उपलब्ध छ । यी वाहेक बाई–डाइरेक्सनल क्विक सिफ्टर, ट्रयाक्सन कन्ट्रोल, ड्युअल च्यानल एबीएस र स्लिपर क्लच छ ।

यो बाइकमा फुल एलईडी लाइट र अपाचेकै ५.० इन्चको टीएफटी डिस्प्ले दिइएको छ । त्यसैगरी स्टिल ट्रेलिस फ्रेम, ह्विल र सस्पेन्सनको प्रयोग गरिएको छ ।