अघिल्लो वर्ष ३ पटक मूल्य बढेको बजाज डोमिनार ४०० फेरी भयो १० हजार रुपैयाँले महंगो

बजाज मोटरसाइकलको नेपालका लागि आधिकारिक वितरक हंसराज हुलासचन्द एण्ड कम्पनी प्रालिले नयाँ मूल्य सूची सार्वजनिक गरेको छ । आजदेखी लागु हुने नयाँ मूल्य अनुसार ५ वटा मोडलको मूल्य बृद्धि गरिएको हो । जसमध्ये सबैभन्दा बढी बजाज डोमिनार ४०० मा १० हजार रुपैयाँ बढेको छ । यसअघि ५ लाख ९९ हजार रुपैयाँमा बिक्री गरिँदै आएको यो बाइकको नयाँ मूल्य ६ लाख ९ हजार रुपैयाँ पुगेको छ ।

अघिल्लो वर्षमात्रै ३ पटकसम्म मुल्य बृद्धि गरिएको यो वाइकमा नयाँ वर्ष २०७९ शुरु भएयता पहिलोपटक मूल्य बृद्धि गरिउको हो । बजाज डोमिनार ४०० स्पोर्ट्स टुरर बाइक हो । यसमा ३७३.२७ सीसीको डुअल ओभरहेड क्यामसाफ् इन्जिन छ, जसले ३९.९ पीएसको पावर र ३५ एनएमको टर्क जेनेरेट गर्छ ।

बजाजको सबैभन्दा उच्च सिसी क्षमतायुक्त यो बाइकमा फुल एलईडी हेडज्याम्प, डुअल च्यानल एबीएस, स्लिपर क्लच असिष्ट, अपसाइड डाउन फ्रन्ट फोक्र्स, फ्युल इन्जेक्सन सिष्टम लगायत सुबिधा दिइएको छ । यसैगरी यसको इन्धन क्षमता १३ लिटर छ भने यसले २५.५९ किलोमिटर माइलेज दिने दाबी गरिएको छ ।

सबैभन्दा कम प्लाटिना र पल्सर १५० एसडी र टिडीमा ३ हजार रुपैयाँ बृद्धि गरिएको छ । यसअघि २ लाख ७७ हजार र २ लाख ९३ हजार रुपैयाँमा बिक्री हुँदै आइरहेका यी वाइकको नयाँ मूल्य क्रमश २ लाख ८० हजार र २ लाख ९६ हजार रुपैयाँ पुगेको छ ।

यसैगरी २ लाख १७ हजार रुपैयाँमा बिक्रि हुँदै आइरहेको डिस्कोभर १२५ डिस्कको मूल्य ५ हजार रुपैयाँले बढाएर २ लाख २२ हजार रुपैयाँ पुर्याइएको छ । वाँकी १३ वटा मोडलको मूल्य भने यसअघिकै लाई कायम गरिएको छ ।