बजेटको असर : बजाज डोमिनार २५० मा एकै पटक बढ्यो ४७ हजार मूल्य

काठमाडौं – नेपाली बजारमा बजाज डोमिनार २५० को मूल्य एकैपटक ४७ हजार रुपैयाँले बढेको छ । पहिले यसको मूल्य ५ लाख २० हजार ९ सय रुपैयाँ भएकोमा आज देखि यसको मूल्य ५ लाख ६७ हजार ९ सय रुपैयाँ पुगेको हो ।

नेपालमा बजाज बाइकको आधिकारिक वितरक हंसराज हुलासचन्द एन्ड कम्पनीले वेबसाइटमा नयाँ मूल्य सूचीकृत गरेको छ । यस अनुसार यो बाइकको मूल्यमा यति धेरै वृद्धि गरिएको हो ।

सरकारले हालै प्रस्तुत गरेको बजेटमार्फत २०० सीसी भन्दा बढीको मोटरसाइकलको करमा वृद्धि गरेको थियो । यस अनुसार बजाजका अन्य बाइकको मूल्यमा समेत वृद्धि गरिएको छ ।

यस अनुसार बजाज पल्सर २२०एफको मूल्यमा ७ हजार रुपैयाँले वृद्धि भई ३ लाख ७४ हजार ९ सय रुपैयाँ पुगेको छ भने डोमिनार ४०० को मूल्य १६ हजार रुपैयाँले वृद्धि भई ६ लाख २४ हजार ९ सय रुपैयाँ पुगेको छ ।

नेपाली बजारमा उपलब्ध बजाज बाइक र तिनको मुल्य सूची यहाँ हेर्न सकिन्छ ।