४० हजार रुपैयाँ सम्म घट्यो नेपालमा उपलब्ध एथर इलेक्ट्रिक स्कुटरको मूल्य

काठमाडौं – नेपाली बजारमा उपलब्ध एथर इलेक्ट्रिक स्कुटरका तीनवटै भेरिएन्टको मूल्य घटेको छ । नेपालका लागि एथर इलेक्ट्रिक स्कुटरको आधिकारिक वितरक अर्गनाजेसन अन्तर्गतको वैद्य इनर्जीले नेपाली बजारमा नयाँ २०२५ संस्करणको मोडल भित्र्याए पश्चात मूल्य समेत घटाएको हो ।

नेपाली बजारमा एथर ४५० एस र एथर ४५० एक्स रहेका छन् । ती मध्ये एथर ४५० एसको एउटै भेरिएन्ट उपलब्ध छ भने एथर ४५० एक्सको दुईवटा भेरिएन्ट रहेका छन् ।

एथर ४५० एसको मूल्य पहिले ३ लाख ५० हजार रुपैयाँ रहेकोमा अब २५ हजार रुपैयाँ मूल्य घटेर ३ लाख २४ हजार ९९९ मात्र रहेको छ । यसमा २.९ किलोवाट आवरको ब्याट्री प्याक रहेको छ । यसले सिंगल चार्जमा १२२ किलोमिटरको रेन्ज दिने बताइएको छ भने वास्तविक रेन्ज १०५ किलोमिटर भएको कम्पनीको भनाइ छ ।

यो इलेक्ट्रिक स्कुटरलाई शून्य देखि ८० प्रतिशत सम्म चार्ज गर्न साढे ५ घण्टा लाग्छ भने शून्य देखि ४० किलोमिटर प्रतिघण्टाको गति ३.९ सेकेन्डमै लिन्छ ।

त्यसैगरी एथर ४५० एक्सको २.९ किलोवाट आवर ब्याट्री प्याक भेरिएन्टको मूल्य पहिले ३ लाख ९९ हजार ९९९ रुपैयाँ रहेकोमा अब यसको मूल्य ३ लाख ६४ हजार ९९९ कायम गरिएको छ । यसमा एकैपटक ३५ हजार रुपैयाँ मूल्य घटेको छ ।

यो मोडलमा भएको ब्याट्रीले सिंगल चार्जमा १२६ किलोमिटर रेन्ज दिने बताइए तापनि वास्तविक रेन्ज १०५ किलोमिटर सम्म हुने कम्पनीको भनाइ छ । यसले शून्य देखि ४० किलोमिटर प्रतिघण्टा सम्मको गति ३.३ सेकेन्डमै लिन सक्छ । यसमा भएको ब्याट्रीलाई शून्य देखि ८० प्रतिशत सम्म चार्ज गर्न ३ घण्टा लाग्छ ।

त्यसैगरी एथर ४५० एक्सको ३.७ किलोवाटर आवर ब्याट्रीयुक्त भेरिएन्टको मूल्य ४ लाख ३९ हजार ९९९ बाट घटाएर ३ लाख ९९ हजार ९९९ रुपैयाँ कायम गरिएको छ । यसमा एकै पटक ४० हजार रुपैयाँ मूल्य घटेको हो ।

यसमा भएको ब्याट्रीले सिंगल चार्जमा १६१ किलोमिटरको रेन्ज दिने बताइएको छ भने वास्तविक रेन्ज १३० किलोमिटर भएको कम्पनीको भनाइ छ ।

यो इलेक्ट्रिक स्कुटरलाई शून्य देखि ८० प्रतिशत सम्म चार्ज गर्न साढे ४ घण्टा लाग्छ भने शून्य देखि ४० किलोमिटर प्रतिघण्टाको गति ३.३ सेकेन्डमै लिन्छ ।

तीनवटै भेरिएन्टको टप स्पिड ९० किलोमिटर प्रतिघण्टा रहेको छ । स्कुटरमा टीएफटी टचस्क्रिन, गुगल म्याप्स लगायका विभिन्न फिचर छन् ।

सबै स्कुटरमा ५ वर्ष वा ६० हजार किलोमिटर गुड्ने अवधि सम्मको ब्याट्री वारेन्टी, ३ वर्ष वा ३० हजार किलोमिटर सम्मको स्कुटर वारेन्टी र एथर पोर्टेबल चार्जरमा ३ वर्षको वारेन्टी रहेको छ ।