युरोपमा २०२५ सम्ममा विद्युतीय हवाई ट्याक्सी सेवा शुरु गरिने

युरोपमा सन् २०२५ सम्ममा विद्युतीय हवाई ट्याक्सी सेवा शुरु गरिने भएको छ । यसको लागि आवश्यक तयारी प्रारम्भ गरिएको सो क्षेत्रको शीर्ष वायु सुरक्षा नियामकहरुले बताएका छन् ।

ब्लूमबर्गको रिपोर्ट अनुसार यी हवाई ट्याक्सीहरू यात्रुलाई उडाउने भन्दा पहिले औषधी र अन्य सामग्री आपूर्तिका लागि प्रयोग हुनेछ।यस्ता हवाई ट्याक्सीहरूलाई पाइलट राखिएका हुनेछन् ।

युरोपेली संघ उड्डयन सुरक्षा एजेन्सी (इएएसए) का कार्यकारी निर्देशक प्याट्रिक किले बुधबार भएको एक अनलाइन कार्यक्रममा दिएको जानकारी अनुसार सुरूमा सामग्री ओसारपसारसँगै हवाई ट्याक्सीको प्रयोग र परिक्षण गरिनेछ।

युरोपको आधा दर्जनभन्दा बढी कम्पनीहरूले विद्युतीय हवाई ट्याक्सीको निर्माण घोषणा गरेको रिपोर्टमा उल्लेख गरिएको छ । ठूला विमानहरुका साथै अटोनोमस ड्रोन सेवाहरुले भने थप ५ वर्ष लिनसक्ने किले बताएका छन् ।

इएएसएले मानवरहित उडान विकासको लागि विभिन्न कम्पनीहरूसँग काम थालेको छ। एजेन्सीले अमेरिकी संघीय उड्डयन प्रशासन र अन्य अन्तर्राष्ट्रिय नियामकहरू समन्वयमा काम गरिरहेको बताइएको छ।