ब्याट्री स्वापिङ नेटवर्क विस्तार गर्न जिली र निओबीच रणनीतिक सहकार्य

चिनियाँ अटोमोबाइल कम्पनी जिली होल्डिङ ग्रुप र विद्युतीय सवारीसाधन निर्माता निओले ब्याट्री स्वापिङ तथा ईभी चार्जिङ नेटवर्क विस्तारका लागि रणनीतिक सहकार्य गर्ने भएका छन्। दुवै कम्पनीले सहायक कम्पनी तहमा सेयर आदानप्रदान गर्दै ब्याट्री स्वापिङ तथा चार्जिङ सेवाको नेटवर्क विस्तारलाई तीव्रता दिने योजना बनाएका हुन्।

सम्झौताअनुसार जिलीले आफ्नो ब्याट्री स्वापिङ सेवा प्रदायक यीयी इन्टरनेट टेक्नोलोजीमा रहेको शतप्रतिशत स्वामित्व र ६४ करोड युआन नगद लगानी निओको ब्याट्री स्वापिङ तथा चार्जिङ इकाइ निओ पावरमा गर्नेछ। यो रकम करिब ९ करोड ५३ लाख अमेरिकी डलर बराबर हुन्छ।

कारोबार पूरा भएपछि निओ पावरमा जिलीको ३० प्रतिशत स्वामित्व रहनेछ। लगानीपछि निओ पावरको मूल्यांकन करिब १६ अर्ब युआन अर्थात् २ अर्ब ४० करोड अमेरिकी डलर पुग्ने बताइएको छ।

निओ चीनमा ब्याट्री स्वापिङ प्रविधि अपनाउने प्रारम्भिक विद्युतीय सवारी निर्माता कम्पनीमध्ये एक हो। कम्पनीले सन् २०१७ मा निओ पावर स्थापना गरी ब्याट्री स्वापिङ तथा चार्जिङ सेवा नेटवर्क विकास र सञ्चालन गर्दै आएको छ।

निओका अनुसार सेप्टेम्बर २० सम्म कम्पनीले चीनमा ४ हजार ९९ वटा ब्याट्री स्वापिङ स्टेसन र ५ हजार २८९ वटा चार्जिङ स्टेसन सञ्चालन गरिरहेको छ। कम्पनीका प्रयोगकर्ताले हालसम्म १२ करोडभन्दा बढीपटक ब्याट्री स्वाप गरिसकेका छन्।

सन् २०१७ मा स्थापना भएको यीयी इन्टरनेट टेक्नोलोजीले गत वर्ष अप्रिलसम्म चीनका ४० भन्दा बढी सहरमा ४७० भन्दा बढी ब्याट्री स्वापिङ स्टेसन सञ्चालन गरिरहेको थियो। कम्पनीले आगामी वर्षसम्म आफ्नो नेटवर्क २ हजार स्टेसनमा विस्तार गर्ने योजना बनाएको छ।

यीयीलाई निओ पावरमा एकीकृत गरेपछि निओको ब्याट्री स्वापिङ नेटवर्क विस्तारमा थप गति आउने अपेक्षा गरिएको छ। निओले सन् २०३० सम्म १० हजार ब्याट्री स्वापिङ स्टेसन निर्माण गर्ने लक्ष्य राखेको छ।

त्यसका साथै जिली र निओले ब्याट्री स्वापिङ प्रविधिका लागि एकीकृत मापदण्ड विकास गर्न पनि सहकार्य गर्नेछन्। जिलीले उपभोक्तालाई लक्षित गर्दै ब्याट्री स्वापिङ प्रविधियुक्त नयाँ विद्युतीय सवारी मोडल विकास गर्ने योजना बनाएको छ।

सम्झौताअन्तर्गत निओले जिलीको विद्युतीय सवारी चार्जिङ सेवा प्रदायक झेजियाङ हाओहान इनर्जी टेक्नोलोजीमा समेत लगानी गर्नेछ। कारोबार पूरा भएपछि हाओहानमा निओको १० प्रतिशत स्वामित्व रहनेछ।

दुवै कम्पनीले चार्जिङ नेटवर्क विस्तारका लागि स्रोतसाधन साझेदारी गर्नुका साथै सञ्चालन क्षमता सुधार गर्ने योजना बनाएका छन्।