पानी पर्दा कारको म्याटमुनि पत्रिका राख्नु हुन्छ ? के फाइदा छ? जान्नुहोस्

मनसुनको समयमा कारमा बाहिरको पानी, हिलो र ओसिलोपन कारभित्र पस्नु सामान्य समस्या हो। विशेषगरी भिजेको जुत्ताबाट आएको पानी फुटवेल र प्याडल आसपास जम्मा हुँदा कारको भुइँमा राखिएको म्याटमुनि समेत पुग्न सक्छ। रबर वा कपडाको म्याटले केही हदसम्म पानी रोक्ने भए पनि म्याटमुनि पुगेको ओसिलोपन लामो समयसम्म रहेमा कार्पेटमा दुर्गन्ध आउने, फोहोर जम्ने र कारको भित्री भागमा समस्या देखिन सक्ने सम्भावना हुन्छ।

यस्तो अवस्थामा सामान्य तरिकाले पनि यसको समाधान गर्न सकिन्छ । म्याट र कार्पेटको बीचमा दुई तीनवटा सुख्खा पत्रिकाका पाना समतल रूपमा राख्दा त्यसले अतिरिक्त शोषक तहको काम गर्छ। पत्रिकाले म्याटमुनि पुगेको केही पानी र ओसिलोपन सोस्न मद्दत गर्ने भएकाले कार्पेटसम्म पुग्ने चिसोपन केही कम गर्न सकिन्छ। मनसुनमा कारभित्र बारम्बार पानी पस्ने अवस्थामा यो कम खर्चिलो अस्थायी उपाय बन्न सक्छ।

पत्रिका प्रयोग गर्नुको अर्को फाइदा भनेको कारभित्रको ओसिलोपनबारे चाँडै जानकारी पाउनु हो। म्याट उठाउँदा पत्रिका भिजेको भेटिएमा कारको भुइँमा पानी पुगेको संकेत मिल्छ। यसले समस्या लामो समयसम्म लुकेर बस्न नदिई समयमै कार्पेट सुकाउने मौका दिन्छ। कार्पेटमा लगातार ओसिलोपन रहँदा आउने गन्धलाई कम गर्न पनि यसले अप्रत्यक्ष रूपमा मद्दत गर्न सक्छ।

त्यस्तै, भिजेको जुत्ताबाट आउने हल्का हिलो, धुलो र बालुवाबाट कारको भुइँलाई जोगाउन पनि पत्रिका उपयोगी हुन सक्छ। म्याटमुनि राखिएको कागजमा फोहोर जम्मा भएपछि त्यसलाई निकालेर फाल्न सकिने भएकाले कारको भित्री भाग सफा राख्न केही सहज हुन्छ।

यद्यपि पत्रिकालाई स्थायी समाधानका रूपमा भने लिनु हुँदैन। लामो समयसम्म भिजेको पत्रिका कार्पेटमुनि त्यतिकै छोडिराख्दा उल्टै ओसिलोपन फस्न सक्छ। त्यसैले भिजेको पत्रिका तुरुन्तै हटाएर कार्पेटलाई राम्रोसँग हावा लगाएर सुकाउनुपर्छ। आवश्यक परे घाम वा ब्लोअरको प्रयोग गरेर भुइँ पूर्ण रूपमा सुख्खा बनाउन सकिन्छ।

पत्रिका धेरै तहमा राख्नु पनि उचित हुँदैन। धेरै तह हुँदा म्याट चिप्लिन सक्छ। यसका लागि सामान्य अवस्थामा दुई–तीनवटा समतल पाना पर्याप्त हुन्छ । सबैभन्दा महत्वपूर्ण कुरा चालकको खुट्टा रहने भागमा विशेष सावधानी अपनाउनु हो। पत्रिका म्याटबाट बाहिर निस्किएको वा सरेर ब्रेक, एक्सेलेरेटर वा क्लच प्याडलमा पुग्ने अवस्था हुनु हुँदैन। यसले गाडी चलाउँदा गम्भीर समस्या निम्त्याउन सक्छ ।