मिसिलिनद्वारा भारतमा पहिलोपटक कार टायर उत्पादन, ईभी र आईसीई दुवैका लागि उपयुक्त

काठमाडौं–विश्वप्रसिद्ध टायर निर्माता कम्पनी मिसिलिनले भारतीय बजारलाई लक्षित गर्दै नयाँ ‘प्राइमसी ५’ प्यासेन्जर कार टायर सिरिज सार्वजनिक गरेको छ ।

१६ देखि २२ इन्चसम्मका विभिन्न साइजमा उपलब्ध यो टायरको सुरुवाती मूल्य १० हजार भारु तोकिएको छ । यो मिसिलिनले भारतमै पहिलोपटक स्थानीय रूपमा उत्पादन गरेको प्यासेन्जर कार टायर हो, जसलाई एसयूभी तथा सेडान गाडीका साथै परम्परागत इन्धनबाट चल्ने र विद्युतीय सवारी साधन दुवैका लागि उपयुक्त हुने गरी डिजाइन गरिएको छ ।

विशेष गरी भारतीय सडकको अवस्थालाई ध्यानमा राखेर निर्माण गरिएको यस टायरमा मिसिलिनका चर्चित ‘एभरग्रिप’ र ‘एभरट्रेड’ प्रविधिहरूको प्रयोग गरिएको छ । कम्पनीका अनुसार अन्य ब्रान्डका टायरको तुलनामा यसले सुक्खा सडकमा ४ मिटर र भिजेको सडकमा ८ मिटरसम्म छिटो गाडी रोक्न सक्ने क्षमता राख्छ । साथै, पुराना वा खिइएको अवस्थामा पनि यसले पानीले भिजेको सडकमा ९ मिटर अगावै गाडी रोक्न मद्दत पु-याउँने दाबी गरिएको छ ।

यसका साथै नयाँ प्राइमसी ५ ले सवारी यात्राको आरामदायी अनुभवमा ९ प्रतिशतसम्म सुधार ल्याउने कम्पनीको दाबी छ । कम्पनीका अनुसार, ईभीमा प्रयोग गर्दा यस टायरले अघिल्लो मोडल प्राइमसी ४ एसटीको तुलनामा ६.५ प्रतिशत ऊर्जा दक्षता बढाउँन मद्धत गर्दछ । जसका कारण विद्युतीय गाडीहरूको समग्र ड्राइभिङ रेन्जमा समेत वृद्धि हुने अपेक्षा गरिएको छ ।