‘सेल्फ–हिलिङ पेन्ट’ देखि एडास फिचरसम्मः नेपाल आएको ‘ओरा ५’ ईभीमा के छ त्यस्तो खास?

ग्रेटवाल मोटर (जीडब्लूएम को नेपालका लागि आधिकारिक बितरक भीजी इम्पेक्स प्रालिले आफ्नो बहुप्रतीक्षित प्रिमियम इलेक्ट्रिक एसयूभी ‘ओरा ५’ लन्च गरेको छ । ‘डिजाइन विथ इन्टेलिजेन्स, सेप्ड बाइ एलिगेन्स’ को अवधारणामा विकसित यो नयाँ इलेक्ट्रिक एसयूभीले नेपाली ईभी बजारमा नयाँ तरंग पैदा गर्ने संकेत देखाएको छ ।

कम्पनीले यस गाडीलाई दुईवटा भेरियन्टमा उपलब्ध गराएको छ । विशेष सुरुवाती अफर अन्तर्गत मिड भेरियन्टको मूल्य ४६ लाख ९९ हजार रुपैयाँ र टप भेरियन्टको मूल्य ५१ लाख ९९ हजार रुपैयाँ निर्धारण गरिएको छ ।

‘ओरा ५’ मुख्यतः यी ५ विशेषताका कारण चर्चामा रहने देखिन्छ:

ब्याट्री र रेन्जः यसमा ५८.३ किलोवा आवरको एलएफपी ब्याट्री जडान गरिएको छ । कम्पनीका अनुसार यसले एक पटकको फुल चार्जमा ५२० किलोमिटर (एनईडीसी) सम्मको उत्कृष्ट रेन्ज दिन्छ ।

पावर र पर्फर्मेन्सः यस ईभीमा १०० किलोवाटको इलेक्ट्रिक मोटर छ, जसले २६० एनएमको पीक टर्क जेनेरेट गर्छ ।

सुरक्षाः सुरक्षाका दृष्टिकोणले यस गाडीले प्रतिष्ठित एएनक्याप र युरो एनक्याप दुवैमा ५–स्टार रेटिङ पाएको छ । यसमा ७ वटा एयरब्याग र एडप्टिभ क्रुज कन्ट्रोल, लेन किप असिस्ट र अटोमेटिक इमर्जेन्सी ब्रेकिङ लगायत २० भन्दा बढी एडास फिचर छन् ।

ग्राउन्ड क्लियरेन्सः नेपालका सडकहरूलाई सुहाउँदो २०० एमएमको ग्राउन्ड क्लियरेन्स यसमा रहेको छ ।

अन्य आधुनिक फिचरः प्यानोरामिक सनरुफ, ३६० डिग्री सराउन्ड भ्यु क्यामेरा, १४.६ इन्चको फ्लोटिङ टचस्क्रिन र सानोतिना स्क्र्याचहरू आफैं हट्ने ‘सेल्फ–हिलिङ पेन्ट’ प्रविधि यसका मुख्य आकर्षण हुन् ।

मूल्य र प्रतिस्पर्धा
नेपालमा ५० लाख रुपैयाँ आसपासको बजेट रेन्जमा इलेक्ट्रिक एसयूभीहरूको माग सबैभन्दा उच्च छ । ओरा ५ को मूल्य (४६.९९ लाख देखि ५१.९९ लाख सम्म) यही ’स्वीट स्पट’ मा पर्दछ । यसले बजारमा बलियो उपस्थिति जनाएका अन्य स्थापित ब्रान्डहरू (जस्तैः बीवाईडी एट्टो३, ओमोडा ई५, र दिपल एस०५) सँग सिधा प्रतिस्पर्धा गर्ने देखिन्छ । प्रतिस्पर्धी मूल्य र प्रिमियम फिचर्सका कारण यो उपभोक्ताको प्राथमिकतामा पर्न सक्छ ।

धेरैजसो ईभीहरू एउटै बक्स जस्तो डिजाइनमा आइरहेका बेला ओरा ५ को ‘रेट्रो र फ्युचरिस्टिक’ फ्युजनले यसलाई भीडमा फरक देखाउँछ । यो भिन्न र युनिक लुक्स मन पराउने आधुनिक उपभोक्ताहरूका लागि ठूलो आकर्षण बन्न सक्छ ।