बीवाईडीले ल्यायो एआईमा आधारित नयाँ सुरक्षा प्रविधि, गाडीमुनि रहेका मानिस वा जनावर पहिचान गर्ने

चिनियाँ विद्युतीय तथा हाइब्रिड सवारी निर्माता बीवाईडीले सवारी सुरक्षा क्षेत्रमा नयाँ प्रविधि सार्वजनिक गरेको छ। कम्पनीले हालै पेटेन्ट दर्ता गराएको कृत्रिम बौद्धिकता (एआई) मा आधारित प्रणालीले गाडीमुनि रहेका मानिस वा जनावरलाई पहिचान गर्न सक्ने क्षमता राख्छ।

पार्किङका क्रममा वा सवारी सञ्चालनअघि गाडीमुनि रहेको कुनै जीवित प्राणी नदेखिँदा दुर्घटना हुने जोखिमलाई कम गर्ने उद्देश्यले यो प्रविधि विकास गरिएको कम्पनीले जनाएको छ। परम्परागत वस्तु पहिचान गर्ने प्रणालीभन्दा फरक, यो प्रविधिले जीवित प्राणीको उपस्थिति छुट्याएर पहिचान गर्न सक्छ।

बीवाईडीको नयाँ प्रणाली ‘बेसलाइन इमेजिङ’ प्रविधिमा आधारित छ। गाडी पार्क गरिएको अवस्थामा प्रणालीले सवारीको तल्लो भागको विस्तृत तस्बिर खिचेर सुरक्षित राख्छ। यही तस्बिरलाई आधार मानेर गाडी पुनः सञ्चालन गर्नुअघि वास्तविक समयको तस्बिरसँग तुलना गरिन्छ।

यदि गाडीमुनि कुनै नयाँ वस्तु, मानिस वा जनावर देखिएमा प्रणालीले त्यसलाई तुरुन्तै पहिचान गर्न सक्छ। यसले स्थायी रूपमा रहेका भागहरू जस्तै ब्याट्री प्याक, सस्पेन्सन तथा अन्य हार्डवेयरलाई बेवास्ता गर्दै केवल परिवर्तन भएका क्षेत्रलाई मात्र विश्लेषण गर्छ। यसका कारण कम्प्युटिङ भार कम हुने र पहिचानको शुद्धता बढ्ने कम्पनीको दाबी छ।

यो प्रविधिले दुई चरणमा काम गर्छ। पहिलो चरणमा आधार तस्बिर र वास्तविक समयको तस्बिरबीचको भिन्नता पहिचान गरिन्छ। त्यसपछि दोस्रो चरणमा उन्नत एल्गोरिदममार्फत उक्त वस्तु जीवित प्राणी हो वा होइन भन्ने निर्धारण गरिन्छ।

गाडीको तल्लो भागमा धुलो, हिलो, छायाँ, अँध्यारो तथा असमतल सतहजस्ता चुनौतीपूर्ण अवस्था हुने भएकाले सही पहिचान गर्नु जटिल मानिन्छ। बीवाईडीले आफ्नो नयाँ प्रणाली यस्ता चुनौतीपूर्ण परिस्थितिमा पनि प्रभावकारी रूपमा काम गर्ने गरी विकास गरिएको जनाएको छ।

कम्पनीका अनुसार यो प्रविधि केवल दुर्घटना रोक्ने उपाय मात्र नभई समग्र सुरक्षा प्रणालीको महत्वपूर्ण हिस्सा हो। यसअघि बीवाईडीले गाडीभित्र यात्रु वा बालबालिका छुटेर बसेको अवस्था पहिचान गर्न सक्ने राडारमा आधारित इन–क्याबिन सुरक्षा प्रणाली पनि विकास गरिसकेको छ।

नयाँ अन्डरबडी पहिचान प्रणाली र इन–क्याबिन राडारलाई एकीकृत गर्दै बीवाईडीले गाडीको भित्र र बाहिर दुवै क्षेत्रमा निगरानी गर्न सक्ने समग्र सुरक्षा इकोसिस्टम निर्माण गर्ने लक्ष्य लिएको छ। यसमा राडार, कम्प्युटर भिजन तथा एआई प्रविधिको संयोजन प्रयोग गरिएको छ।

विद्युतीय सवारी उद्योगमा सुरक्षा प्रविधिको महत्व बढिरहेका बेला बीवाईडीको यो नयाँ आविष्कारलाई भविष्यका स्मार्ट सवारीका लागि महत्वपूर्ण कदमका रूपमा हेरिएको छ। विशेषगरी बालबालिका, घरपालुवा जनावर तथा पैदल यात्रुको सुरक्षामा यसले महत्वपूर्ण भूमिका खेल्न सक्ने अपेक्षा गरिएको छ।

हाल कम्पनीले यो प्रविधि कुन मोडलमा र कहिलेदेखि व्यावसायिक रूपमा प्रयोग गरिने भन्नेबारे विस्तृत जानकारी सार्वजनिक गरेको छैन। तर, बीवाईडीको यो नयाँ एआई प्रणालीले आगामी दिनमा सवारी सुरक्षा प्रविधिको विकासलाई नयाँ दिशा दिन सक्ने विश्वास गरिएको छ।