घट्यो सुजुकी ई–भिटाराको मूल्य, अब कति ?

काठमाडौं नेपालका लागि सुजुकी गाडीको आधिकारिक वितरक सीजी मोटोकर्पले सुजुकीको नेपालमा उपलब्ध पहिलो ब्याट्री इलेक्ट्रिक भेइकल (बीईभी) सुजुकी ई–भिटाराको मूल्यमा १ लाख रुपैयाँ कमी गरेको छ । हालै सार्वजनिक बजेटमार्फत सरकारले बीईभीमा भन्सार महसुल र करका दरमा गरेको परिवर्तनको प्रत्यक्ष परिणाम यो भएको कम्पनीले बताएको छ ।

सीजी मोटोकर्पले गत चैत महिनामा पोखरामा सम्पन्न वाडा अटो शोमार्फत सुजकी ई–भिटारा औपचारिक रुपमा नेपालमा बिक्री वितरण प्रारम्भ गरेको थियो । त्यतिबेला देखि नै यसका चार भेरिएन्ट उपलब्ध छन् । सबैभन्दा कम मूल्यको भेरिएन्ट ई–भिटारा डेल्टा ४९ लाख ९९ हजार रुपैयाँमा उपलब्ध थियो । अब भने यसको मूल्य ४८ लाख ९९ हजार रुपैयाँ मात्र कायम गरिएको छ ।

सुजुकी ई–भिटाराका सबै भेरिएन्टमा १ लाख रुपैयाँ मूल्य कम गरिएको हो । यस अनुसार अब ई–भिटारा जेटाको मूल्य ५२ लाख ९९ हजार, अल्फाको मूल्य ५८ लाख ९९ हजार र अल्फा डीटीको मूल्य ५९ लाख ४९ हजार रुपैयाँ हुनेछ । यी सबै भेरिएन्टको एमआरपी भने क्रमशः ५२ लाख ९९ हजार, ५७ लाख ९९ हजार, ६३ लाख ९९ हजार र ६४ लाख ४९ हजार रुपैयाँ रहेको छ ।

सुजुकी ई–भिटारा दुई उच्च–क्षमताका ब्याट्री विकल्पहरू ४९ किलोवाट आवर र ६१ किलोवाट आवरमा उपलब्ध छ, जसले क्रमशः १०६ किलोवाट र १२८ किलोवाटको दमदार पावर आउटपुट दिन्छ । यी क्लास–लिडिङ आउटपुट सहितका उत्कृष्ट विशेषताहरूले ई–भिटारालाई यसको मूल्य वर्गमा उपलब्ध सबैभन्दा शक्तिशाली विद्युतीय गाडीको रूपमा स्थापित गर्दछ। यसले अत्याधुनिक ईभी प्रविधिलाई सुजुकी ब्रान्डको प्रमाणित विश्वास, टिकाउपन र विश्वसनीयतासँग सहज रूपमा जोडेको कम्पनीको भनाइ छ।

सुजुकी ई–भिटारा बुकिङ गर्ने पहिलो १०० ग्राहकलाई सो परिचयात्मक मूल्यमा गाडी उपलब्ध हुनेछ । सीजी मोटोकर्पका प्रबन्ध निर्देशक करण चौधरीले सरकारले सवारी साधनलाई थप सुलभ बनाउने बाटो तय गरे अनुसार त्यो सुविधा ग्राहकसम्म बिना कटौती पुर्याउनु कम्पनीको दायित्व भएको र त्यसै अनुसार मूल्य कटौती गरिएको बताए ।

२५ वटा आधिकारिक बिक्री केन्द्र, ४० वटा बिक्री पछिका सेवा केन्द्र र दक्ष ईभी प्राविधिकहरुका साथ नेपालको सबैभन्दा ठूलो नेटवर्क र सेवा सुविधा भएको ईभी ब्रान्ड बनेको कम्पनीको भनाइ छ ।