४५ भन्दा बढी सेफ्टी फिचरसहित आयाे २०२६ हुन्डाई एक्स्टर

हुन्डाई मोटर इन्डियाले आफ्नो लोकप्रिय माइक्रो एसयूभी एक्स्टरको नयाँ २०२६ फेसलिफ्ट संस्करण भारतीय बजारमा लन्च गरेको छ । सन् २०२३ मा पहिलोपटक लन्च भएपछि सो मोडलमा गरिएको यो पहिलो ठुलो अपडेट हो ।

नयाँ एक्स्टरको लन्चसँगै यसको बुकिङ पनि खुला गरिएको छ। ग्राहकहरूले अनलाइन वा नजिकैको हुन्डाई शाेरुममार्फत बुकिङ गर्न सक्नेछन्, र यस महिनाको अन्त्यसम्म डेलिभरी सुरु हुने कम्पनीले जनाएको छ। बजारमा यसले टाटा पन्च, मारुती सुजुकी भिटारा ब्रेजा र निसान म्याग्नाइटसँग प्रतिस्पर्धा गर्ने अपेक्षा गरिएको छ।

डिजाइनको हिसाबले नयाँ एक्स्टरको फ्रन्टमा नयाँ बम्पर, कालो रेडिएटर ग्रिल र १५ इन्चका डायमण्ड कट अलोय ह्विल राखिएको छ । पछाडिको भागमा पुनः डिजाइन गरिएको टेलगेट र नयाँ विङ शैलीको स्पोइलरले यसको लुकलाई थप आधुनिक बनाएको छ । साथै, गोल्डेन ब्रोन्ज र टाइटेनियम ब्ल्याक म्याट जस्ता नयाँ रङ विकल्प पनि उपलब्ध गराइएको छ ।

कारको इन्टेरियरमा पनि उल्लेखनीय परिवर्तन गरिएको छ । ड्युअल टोन नेभी र ग्रे थिम, थ्रीडी कार्बन प्याटर्न फिनिश भएको ड्यासबोर्ड, डी कट स्टेयरिङ ह्विल, मेटल प्याडल र फोल्डिङ ड्राइभर आर्मरेस्ट जस्ता फिचरले क्याबिनलाई प्रिमियम अनुभव दिन्छ ।

नयाँ एक्स्टरमा सेगमेन्टमै पहिलो पटक समावेश गरिएका केही विशेष सुविधाहरू पनि छन्। यसमा इनबिल्ट ड्यास क्याम, वायरलेस एन्ड्रोइड अटो र एप्पल कारप्ले, ६० भन्दा बढी ब्लुलिङक कनेक्टिभिटी सुविधा र इन्टरनेट बिना सञ्चालन हुने ३०० भन्दा बढी भ्वाइस कमान्ड समावेश छ । साथै, इलेक्ट्रिक सनरुफ, डिजिटल इन्स्ट्रयुमेन्ट क्लस्टर र पछाडिका यात्रुका लागि टाइप सी युएसबी पोर्ट जस्ता फिचर समावेश छ ।

सेफ्टीका लागि यसमा ४५ भन्दा बढी सुविधाहरू समावेश गरिएको छ, जसमध्ये ३० वटा सबै भेरिएन्टमा स्ट्यान्डर्ड रूपमा उपलब्ध छ । यसमा ६ वटा एयरब्याग, इलेक्ट्रोनिक स्टेबिलिटी कन्ट्रोल र हिल स्टार्ट असिस्ट जस्ता प्रविधि समावेश गरिएको छ ।

नयाँ एक्स्टरमा १.२ लिटर चार सिलिन्डर पेट्रोल इन्जिन राखिएको छ, जसले ८३ हर्स पावर उत्पादन गर्छ। कम्पनीले यस सेगमेन्टमा ४ सिलिन्डर इन्जिन दिने यो एकमात्र मोडल भएको दाबी गरेको छ। यो म्यानुअल र अटोमेटिक दुवै गियरबक्स विकल्पमा उपलब्ध हुनेछ। साथै, ड्युअल सिलिन्डर सीएनजी भेरिएन्ट पनि उपलब्ध छ, जसमा स्पेयर ह्विललाई गाडीको मुनि राखिएको छ र २२५ लिटरको बुट स्पेस उपलब्ध हुन्छ।