लिक्विड सोलिड स्टेट ब्याट्रीमा आउँदै एमजी ४, बीवाईडी एट्टो २ सँग प्रतिस्पर्धा गर्ने

एमजीले आफ्नो नयाँ विद्युतीय एसयूभी एमजी ४एक्स लिक्वड सोलिड ब्याट्रीका साथ आउने घोषणा गरेको छ । हालै डेब्यु गरिएको सो नयाँ एसयूभी एमजी ४ परिवारमा पहिलो शुद्ध विद्युतीय एसयूभी हुने जनाइएको छ ।

युवा अटो पारखीलाई मध्यनजर गरी तयार पारिने यस एसयूभीले असीमित सम्भावनाहरुको प्रतिनिधित्व गर्ने एसएआईसीको भनाइ छ । एमजी ४ कै डिजाइन ल्यांग्वेजलाई फलो गरी तयार पारिने सो नयाँ एसयूभीमा केही विशेष एलेमिन्टहरु भने थप हुनेछन् ।

फ्रन्ट फेसियालाई आकर्षक बनाउन एमजीले यसमा नयाँ थ्रु–टाइप लाइट बारसँग जोडिएको ब्रान्डको सिग्नेचर इल्युमिनेटेड लोगो दिएको छ । अगाडिको बम्परले ब्रान्डको स्पोर्टी लुक्सलाई सुदृढ पारेको छ ।

इन्टेरियरबारे विस्तृत जानकारी बाहिर नल्याएको एमजीले यस एसयूभीमा ओप्पेसँग मिलेर विकास गरिएको स्मार्ट ककपिट उपलब्ध गराउने अपेक्षा गरिएको छ । कारमा उपलब्ध हुने ‘ह्यान्ड–कार इन्टरकनेक्सन’ सिस्टमले प्रयोगकर्ताको स्मार्टफोन र गाडीको इन्फोटेनमेन्ट प्रणालीबीच एकदमै छिटो अन्तरक्रिया गर्न सक्षम बनाउँछ ।

चालक सहायताका लागि एमजी ४एक्सले होराइजन रोबोटिक्ससँग साझेदारीमा विकसित हार्डवेयर प्रयोग गर्ने जनाइएको छ ।उच्च गतिको नेभिगेट अन पाइलट र स्वचालित पार्किङ फंक्सन उपलब्ध हुने हुँदा यही सेग्मेन्टका अन्य एसयूभीको तुलनामा यसले उत्कृष्ट अनुभव प्रदान गर्ने दाबी गरिएको छ ।

सो नयाँ एसयूभीमा उपलब्ध हुने पावरट्रेनबारे एमजीले कुनै जानकारी बाहिर ल्याएको छैन । यद्यपि, यसमा जडान हुने लिक्वड सोलिड स्टेट ब्याट्रीले एकपटकको फुल चार्जमा ५१० किलोमिटर रेन्ज दिने र बीवाईडी एट्टो २ सँग कडा प्रतिस्पर्धा गर्ने दाबी गरिएको छ ।