ग्लोबल एनक्यापले सवारी साधनको सुरक्षा कसरी जाँच्छ ? प्रक्रिया यस्तो छ

ग्लोबल एनसीएपी (एनक्याप) ले सवारी साधनको सुरक्षा स्तर मूल्याङ्कन गर्न वैज्ञानिक र व्यावहारिक क्र्यास परीक्षणहरू सञ्चालन गर्छ। यस संस्थाले विश्वभर बिक्री हुने कारहरू परीक्षण गरी १ देखि ५ स्टारसम्मको सेफ्टी रेटिङ प्रदान गर्छ। यी स्टार केवल अंक होइनन्, वास्तविक दुर्घटनाको अनुकरण र गहिरो विश्लेषणबाट तय गरिएका सुरक्षा मापदण्ड हुन्।

परीक्षण प्रक्रिया सवारी साधनको छनोटबाट सुरु हुन्छ। कहिलेकाहीँ निर्माता स्वयंले गाडी उपलब्ध गराउँछन् भने धेरै अवस्थामा ग्लोबल एनसीएपीले डिलरशिप वा कारखानाबाट अनियमित रूपमा गाडी छनोट गर्छ। उपभोक्ताले बजारमा किन्न पाउने वास्तविक मोडल नै परीक्षण होस् भन्ने सुनिश्चित गर्न गाडीको भेइकल आइडेन्टिफिकेसन नम्बर सिल गरिन्छ।

त्यसपछि क्र्यास परीक्षणका लागि गाडीभित्र विशेष डमीहरू राखिन्छ । चालक र अगाडिको यात्रु सिटमा वयस्क डमी तथा बाल सुरक्षाको मूल्याङ्कनका लागि बच्चा डमी प्रयोग गरिन्छ। यी डमीमा टाउको, घाँटी, छाती र खुट्टामा सेन्सर जडान गरिन्छ, जसले दुर्घटनाको बेला मानव शरीरमा पर्ने असर मापन गर्छ।

मुख्य परीक्षणमध्ये अगाडिको अफसेट क्र्यास परीक्षणमा गाडीलाई ६४ किलोमिटर प्रतिघण्टाको गतिमा ४० प्रतिशत ओभरल्यापसहित डिफोर्मेबल ब्यारियरसँग ठोक्काइन्छ। त्यसपछि साइड इम्प्याक्ट परीक्षण गरिन्छ, जहाँ ५० किलोमिटर प्रतिघण्टाको गतिमा गाडीको छेउबाट ठक्कर दिइन्छ। केही मोडलमा पोल इम्प्याक्ट परीक्षण पनि गरिन्छ, जसले रूख वा बिजुलीको पोलसँग ठोक्किएको अवस्था देखाउँछ।

दुर्घटनापछि गाडीको संरचना, ढोका खुल्ने अवस्था र डमीमा परेको चोटपटकको विस्तृत विश्लेषण गरिन्छ। अन्तिम चरणमा वयस्क, बाल यात्रु सुरक्षा र इलेक्ट्रोनिक स्टेबिलिटी कन्ट्रोलजस्ता सुरक्षा सहायक प्रणालीका आधारमा अंक दिइन्छ। यी सबैको समग्र मूल्याङ्कनपछि सवारी साधनलाई १ देखि ५ स्टारसम्मको सेफ्टी रेटिङ प्रदान गरिन्छ, जसले उपभोक्तालाई सुरक्षित गाडी छनोट गर्न सहयोग पुर्‍याउँछ।