भिनफास्टले भारतमा बेच्यो १ हजार बढी ईभी

भियतनामी ईभी निर्माता भिनफास्टले भारतमा ईभी बिक्री थालेको ४ महिना पुरा भएको छ । उक्त अबधीमा कम्पनीले १ हजार भन्दा बढी युनिट ईभी बिक्री गर्न सफल भएको छ ।

भिनफास्टले २०२५ मा तीन महिनाको अवधिमा लगभग ८३० युनिट कार बिक्री गरेको थियो । २०२६ मा बिक्रीले गती लिन थालेको र हालसम्म २०० भन्दा बढी ईभी बिक्री भएको बताइएको छ ।

टाटा मोटर्स, एमजी र महिन्द्रा पछि भारतमा चौथो प्रमुख ईभी ब्रान्डको रूपमा देखा परेको भिनफास्टले गत वर्ष सेप्टेम्बरमा भीएफ६ र भीएफ ७ मध्यम आकारको इलेक्ट्रिक एसयूभीको सुरुवातसँगै भारतमा आफ्नो सञ्चालन सुरु गरेको थियो ।

भीएफ६ मा २०१ बिएचपी र ३१० एनएम टर्क जेनेरेट गर्न सक्षम सिंगल मोटर उपलब्ध गराइएको छ । ५९.६ किलोवाट आवरको ब्याट्री प्याक जडान गरिएको यस कारले ४८० किलोमिटर रेन्ज प्रदान गर्दछ ।

त्यसैगरी, भीएफ ७ ५९.६ किलोवाट आवर र ७०.८ किलोवाट आवर गरी दुई ब्याट्री विकल्पमा उपलब्ध छ । सिंगल चार्जमा ४८० किलोमिटरसम्म रेन्ज दिने दाबी गरिएको यस मोडलमा सिंगल र डुअल मोटरको विकल्प पाउन सकिन्छ ।