नर्वेमा सन् २०२५ मा बिक्री भएका ९६ प्रतिशत नयाँ कारहरू पूर्ण रूपमा इलेक्ट्रिक

नर्वे इलेक्ट्रिक सवारी साधनतर्फको रूपान्तरणमा ऐतिहासिक उपलब्धिको नजिक पुगेको छ। आधिकारिक तथ्याङ्क अनुसार सन् २०२५ मा नर्वेमा दर्ता भएका सबै नयाँ कारहरू पूर्ण रूपमा इलेक्ट्रिक छन् । नर्वे विश्वमै इलेक्ट्रिक सवारी साधन अपनाउने अग्रणी राष्ट्रका रूपमा स्थापित भएको छ ।

रिपोर्टका अनुसार सन् २०२५ मा दर्ता भएका ९५.९ प्रतिशत नयाँ कारहरू पूर्ण इलेक्ट्रिक थिए। डिसेम्बर महिनामा मात्र यो हिस्सा झन्डै ९८ प्रतिशत पुगेको थियो। यो दर सन् २०२४ को ८८.९ प्रतिशतको तुलनामा उल्लेखनीय रूपमा बढी हो।

सन् २०२५ मा टेस्लाले नर्वेको कार बजारमा आफ्नो वर्चस्व कायम राख्यो। कम्पनी लगातार पाँचौं वर्ष सबैभन्दा धेरै बिक्री हुने कार ब्रान्ड बन्न सफल भयो। टेस्लाको बजार हिस्सा १९.१ प्रतिशत रह्यो, जबकि फक्सवागन १३.३ प्रतिशत र भल्भो ७.८ प्रतिशतमा सीमित रहे। विशेषगरी टेस्ला मोडल वाईको उच्च मागका कारण कम्पनीले एकै वर्षमा २७ हजार ६२१ कार बिक्री गर्यो ।

नर्वेमा चिनियाँ निर्मित कारहरूको माग पनि तीव्र रूपमा बढेको छ। सन् २०२५ मा चिनियाँ कारहरूको बजार हिस्सा १३.७ प्रतिशत पुगेको छ, जुन अघिल्लो वर्षको १०.४ प्रतिशतभन्दा उल्लेखनीय वृद्धि हो।

नर्वेली सरकारले सन् २०२५ को अक्टोबरमा महत्त्वपूर्ण नीति निर्णय गर्दै जनवरी १, २०२६ देखि इलेक्ट्रिक सवारी साधनमा प्रति कार ५ हजार अमेरिकी डलरसम्म भ्याट लगाइने घोषणा गरेको थियो। यस घोषणापछि ग्राहकहरू र अटो कम्पनीहरूले कर लागू हुनुअघि नै गाडी खरिद र डेलिभरी सुनिश्चित गर्न तीव्रता देखाए। धेरै अटो कम्पनीहरूले समयभन्दा अगाडि डेलिभरी गर्न अन्य बजारका सवारी साधनहरू नर्वेतर्फ मोडेको जनाइएको छ।