टाटा अभिन्या २०२६ को अन्त्यमा लन्च हुने, रेन्ज ५०० किलोमिटर भन्दा बढी

टाटा मोटर्सले भारतमा आफ्नो प्रिमियम इलेक्ट्रिक कार टाटा अभिन्या २०२६ को अन्त्यसम्ममा लन्च गर्ने औपचारिक घोषणा गरेको छ। कम्पनीले यसअघि अटो एक्स्पो २०२५ मा यसको कन्सेप्ट मोडल सार्वजनिक गरेको थियो।  साथै कम्पनीले सन् २०३० सम्ममा भारतमा पाँचवटा नयाँ इलेक्ट्रिक कार लन्च गर्ने योजना बनाएको छ ।

टाटा अभिन्या कम्पनीको जेन थ्री इलेक्ट्रिक सवारी आर्किटेक्चरमा आधारित हुनेछ। सो ब्याट्री इलेक्ट्रिक सवारी साधनका लागि विशेष रूपमा विकास गरिएको स्केटबोर्ड शैलीको प्लेटफर्म हो । यस प्लेटफर्मले सफ्टवेयर इन्टिग्रेशेन, फास्ट चार्जिङ र लङ ड्राइभिङ रेन्ज सपोर्ट गर्छ । कम्पनीले भविष्यमा ल्याउने अधिकांश इलेक्ट्रिक सवारी साधनहरू यही प्लेटफर्ममा निर्माण गर्ने योजना बनाएको छ । टाटा अभिन्याको सम्भावित ड्राइभिङ रेन्ज ५०० किलोमिटरभन्दा बढी हुन सक्ने अनुमान गरिएको छ।

कम्पनीले टाटा अभिन्यामा प्रविधिसँगै प्रयोगकर्ता अनुभवमा विशेष ध्यान दिएको देखिन्छ। यसको इन्टेरियर डिजाइन मिनिमलिस्ट र लाउन्ज स्टाइलको हुने सम्भावना छ, जसले यात्रुलाई प्रिमियम र आरामदायी अनुभूति दिनेछ । यसको क्याबिन डिजाइन हाल उपलब्ध अन्य इलेक्ट्रिक एसयूभीभन्दा फरक र आधुनिक हुने अपेक्षा गरिएको छ ।

टाटा मोटर्सले अहिलेसम्म टाटा अभिन्याको आधिकारिक मूल्य सार्वजनिक गरेको छैन। तर यसको मूल्य भारतीय बजारमा करिब २२ लाखदेखि ३५ लाख भारुसम्म पर्न सक्ने अनुमान गरिएको छ ।