परीक्षण सकिँदा पनि सुजुकीको इलेक्ट्रिक कार वागन आर किन लन्च भएन ?

मारुती सुजुकीले आफ्नो पहिलो इलेक्ट्रिक कार ई-भिटारा लन्च गर्ने तयारी गरिरहेको छ । कम्पनीले २०२६ को सुरुवातमा सो एसयूभी बजारमा ल्याउने लक्ष्य बनाएको छ ।

सर्वप्रथम मारुतीले आफ्नो पहिलो ईभी वागन आर लन्च गर्न लागेको थियो । कम्पनीले वागन आरको इलेक्ट्रिक भर्सनको वर्षौं परीक्षण पनि गरिसकेको थियो । तर अन्ततः सो गाडी बजारमा नआउने निर्णय गरियो ।

कम्पनीका अनुसार इलेक्ट्रिक वागन आर लन्च हुनुका मुख्य कारणहरू केही महत्वपूर्ण व्यावसायिक तथा बजार–केन्द्रित पक्षहरूसँग जोडिएका छन् । वागन आर भारतको लोकप्रिय इन्ट्री–लेभल ह्याचब्याक हो, जहाँ ग्राहकहरू मूल्यप्रति अत्यधिक संवेदनशील हुन्छन् । तर यसको इलेक्ट्रिक भेरिएन्टको मूल्य लगभग १० लाख भारुसम्म पुग्ने अनुमान गरिएको थियो, जसले बजारमा प्रतिस्पर्धा गर्न कठिन बनाउँथ्यो ।

त्यस्तै, पछिल्ला वर्षहरूमा ह्याचब्याक सेग्मेन्टमा पेट्रोल कारको बिक्री घट्दै गएको छ । यदि यही सेग्मेन्टमा ईभी ल्याइएमा, त्यस्तै कमजोर माग दोहोरिने सम्भावना कम्पनीले देख्यो । त्यसैगरी, हाल एसयूभीको लोकप्रियता तीव्र रूपमा बढिरहेको छ । यही परिस्थितिमा मारुतीले आफ्नो पहिलो ईभीका रूपमा एसयूभी नै उपयुक्त हुने निष्कर्ष निकालेको हो ।

कम्पनीले पनि विगतदेखि ईभीको तुलनामा हाइब्रिड र आईसीई सवारी साधनलाई प्राथमिकता दिने रणनीति खुला रूपमा बताएको छ । भारतमा ईभीहरूको संख्या अहिले पनि कम भएकाले बजार संरचना तयार नहुँदासम्म लगानीमा जोखिम हुने उनीहरूको तर्क छ ।

यसरी, बजार, मूल्य र ग्राहकको रोजाइलाई आधार मानेर मारुती सुजुकीले इलेक्ट्रिक वागन आरको स्थानमा ई-भिटारा नै आफ्नो पहिलो इलेक्ट्रिक कारका रूपमा तय गरेको छ ।