टीभीएसको होसुर प्लान्टमा बीएमडब्लु एफ ४५० को उत्पादन सुरु

भारतमा बीएमडब्लु एफ ४५० जीएसको उत्पादन सुरु भएको छ । नयाँ एड्भेन्चर बाइक बैंगलोर नजिकै टीभीएस मोटर कम्पनीको होसुर प्लान्टमा उत्पादन हुन थालेको हो ।

बीएमडब्लु मोटरार्ड र टीभीएस बीचको सहकार्यमा भारतमा बीएमडब्लुका मोटरसाइकल उत्पादन हुँदै आएका छन् । जसको परिणाम स्वरुप नयाँ मोटरसाइकल एफ ४५० जीएसको उत्पादन समेत टीभीएस प्लान्टबाटै भएको हो ।

यी दुई कम्पनीको सहकार्यमा हालसम्म २ लाख युनिट बाइक उत्पादन भएको घोषणा समेत गरिएको छ । एफ ४५० जीएसले ब्रान्डको लाइनअपमा नयाँ इन्ट्री लेभल एड्भेन्चरको रुपमा जी ३१० जीएसलाई प्रतिस्थापन गर्नेछ ।

ट्युबलर स्टिल फ्रेममा आधारित एफ ४५० जीएसको अगाडि ४३ मिलिमिटर केवाईबी अपसाइड–डाउन फोर्क र पछाडि मोनोशक सस्पेन्सन जडान गरिएको छ ।

बाइकमा जडान गरिएको ४५० सीसी ट्विन–सिलिन्डर इन्जिनले ४७.५ बीएचपी पावर र ४३ एनएम टर्क जेनेरेट गर्दछ । साथै, यसमा ६ स्पिड गियरवक्स दिइएको छ ।