केटीएम १२५, २५० र ३९० ड्युकको विश्वव्यापी रिकल, नेपालमा छैन समस्या

केटीएमले ड्युक सिरिजका १२५, २५० र ३९० मोडलका मोटरसाइकललाई विश्वभरबाट फिर्ता बोलाएको छ । २०२४ मा उत्पादन भएका यी मोटरसाइकलको फ्युल ट्यांक क्याप सिलमा समस्या देखिएको भन्दै फिर्ता बोलाइएको हो ।

केटीएमका अनुसार, गुणस्तर परीक्षणहरूले १२५ ड्युक, २५० ड्युक र ३९० ड्युक तथा ९९० ड्युकका केही युनिटमा रहेको फ्युल ट्यांक सिल कम्पनीले निर्धारण गरेको गुणस्तर अनुसार नभएको पत्ता लगाएको छ । कमसल गुणस्तरका ती सिलहरूमा साना दरारहरू विकास हुन सक्ने र जसले गर्दा इन्धन चुहावट हुन सक्ने जनाइएको छ ।

केटीएमले प्रभावित बाइकका मालिकहरूलाई फिर्ता बोलाउने बारे सूचित गर्न र उनीहरूको नजिकको आधिकारिक सेवा केन्द्रमा अपोइन्टमेन्ट बुक गर्न सम्पर्क गर्नेछ । समस्या देखिएका ती बाइकको सिलहरु निःशुल्क फेरिदिने कम्पनीले जनाएको छ ।

ग्राहकहरूले केटीएमको वेबसाइटमा बाइकको भीआईएन मार्फत फिर्ता बोलाईबाट आफ्नो बाइक प्रभावित छ कि छैन भनेर जाँच गर्न सक्नेछन् ।

तर यो समस्या नेपालमा उपलब्ध केटीएमका कुनै पनि मोडलमा नभएको कम्पनी स्रोतले जनाएको छ । यसकारण नेपालमा उपलब्ध कुनै पनि बाइकलाई रिकल गर्नु पर्ने आवश्यकता नभएको समेत बताइएको छ ।